KEIMAH ROVUNGA - 4

                Ziaktu: Biaktea Hillu Ralte

                    BUNG 4-NA

    HEI LE, ZAWLKHAWPUI CHU !

Khatia Haulawng ațanga kan khua, kan In ngei ka'n thleng leh ta kha chu ka chhungte'n min lo lawm dan leh lawm loh dan tur chu in suangtuah thiam mai awm e. Ka Pa chu hawlh hrep ang mai hian a meng sen râm reng a, a țhu ngawi ngalh mai bawk a. Keia tak pawh chuan awm dan tur ka thiam loin ka van viau mai. Tuai thil khawih fuh sak palh ang maiin ka țhu zum dui a, chhungte an chet hlek apiangin ka lo phu ve ui(h) ui(h) zel. Nuam lo tiin inthlahrung viau mah ila ka thiam loh em em ni paw'n ka hre chuang hauh lo a. Diktak chuan Motor ka chuang sual a ni ve mai a, dem viau tur ka awm chuang lo. Harh chiang mang loa motor ka chuan chhan, a thilphal zepui lo chhuahtu Urosiama chu rilruin ka haw hluah hluah reng mai.

Zanriah kil dawn te chuan Paite khual țha ang maiin ka che vat vat a. Ni danga a kil tlai ber ni țhin khan Zanriah chu ka buatsaih thuai thuai a. A țhutchilh hmasa berah țangin ka bar nghal thuai thuai a. Min hauh hma-a kham hman tactic apply a ngai tlat. Chaw ei lah chu a tui ru zek lehnghal a. Chumi țuma ka chaw ei aia ka ei ran leh lem thuai thuai har ka tih țum chu a la awm kher lo ang. Ka kham dawn chuan ka Pa chuan, "Chaw lah hi heh em em ringawt" a ti hram a. Mahse, ka puar hman tawh bakah ka kham tawh tho bawka pawi ka ti lem lo. Diktak chuan ka heh ve em bawk a ni.

Zanah chuan lenchhuah chu chak ve viau mah ila zahna chhete ka neih ve avang leh len chhuah an phal miau loh avang chuan lengchhuak loin Inah ka tawm vel mai mai a. Țhutthlengseia mut zar pah chuan ka hun hman tawh dan leh hman leh zel dan tur chu ka suangtuah vel a. Chutia suangtuahna rama ka ngaihtuahna ka lo kawm vel mai mai lai chuan țhiante bo rawn haw leh ta chu tiin Urosiama ngei chu a rawn lut khat khat a, a thawm ațang mai pawh chuan a kai viau tih chu hai rual a ni lo. Ka bula rawn țhut hnak pah chuan bahlah leh chil per chuai chuai chung chuan, "Zha ... zhanin chu...h ... vha morning Ttheih vhee" a'n ti țeng chhuai a, a ngaihna ka hre lo viau mai. A hriat ve dan chuan zu rui viau hi 'Morning' a lo ni a niawm a, hetiang hian zan thum lai chu a lo morning tawh nghe nghe a niawm e. Zing zu in țhin hoin 'Ka morning a' an tih țhin hi a lo hre ve ngei anih a rinawm.

A ipte ațang chuan Bawngkai Sikret a rawn phawrh a, țan kai tum chuan a lighter chu a'n talh kauh kauh a. Mahse, a morning em avang chuan a țan kai hleithei lo chu a ni. A tawpah chuan a Sikret mi pek pah chuan a theihtawpa puam nalh hian, "Pliss, faiar mai sismawk" a'n ti țalh mai a. Min țan sak rawh a tihna a ni tih chu ka hre mai a, ka țan sak ta a. He țawngkam hi chu a hmang ngun ve viau hrim hrim bawk a.

Urosiama hi keini aia u mah ni se a rualpuite kawm ta lo khan keini; tlema nau deuh kha min kawm khawm a, kan boss rangkachak kha a ni hrim mai. Kan ngaihdan chuan Urosiama khan engkim a hria a, theih loh pawh a nei ngai lo. A duh phawt chuan a ril pawh a phawrh vek thei, mahse a phawrh duh ngai lo mai pawh a. A thu kha chu thutawp a ni tawp a, hnial thiang a ni ngai lo. Tlaiberh sava a ni tih kan hriatchian em em pawh kha Urosiama'n, "Tlaiberh ang chi, Tlaiberh aia te deuh, hmui zum zawk anih hi." a tih tawh chuan 'A ni' hi a ni tawp mai, thu dang a leng lo. Tuma'n Tlaiberh hmuhin kan hmu tawh ngai lo. Titi a thiamin a thil sawite hi a sawi pui thiam țhin hle a. A kam liam chang hian a khabe tlangah kan dak far hlawm țhin. A pa leh a pa țhianpa ramvakin dar ri an hmuh thu a sawi te phei kha chu a hlauhawmin a ngaihnawm tak zet. Sawi chhuak lem lo mah ila kan ngaisangin ropui kan ti țhin hle a, kan rilru te te khan Chawimawina Nopui kan hlan hlawm țheuh ni khan ka hria.

Chutiang khawpa kan Boss rangkachak țhin anih miau avang chuan han haw dawn viau mah ila a theih tak tak chuang lo a. Rilruah ngaihsan rukna leh hlauhna, Boss ena la en deuh tlatna a la awm ve tho mai. Ka bo tak tak a hlauh zia te, an vau thlang lengkira ka lum hlum a lo rin thu te, ka bo tih a hriat rual ruala lengkira hnuaia min zawn nasat zia leh titi dang dang kan vawrh hnu chuan haw zai a rel ve ta a. Ka thaw a veng huai huai mai. A haw hnu chuan keipawh mu turin room lam ka pan ve ta a. Muthilh mai chu harsa ka tiin ka chhungte min ngaihdan tur awm ang te chu ka ngaihtuah a. Ka zakin ka inthlahrung viau mai. Chutihlaiin Ka Ni lah; engtin nge a awm zel tih lah kan hre bawk si lo. Nitin beisei deuhin min lo thlir ve țhin awm si a, ka khawngaih rilru khawp mai.

Chutia ka mu tui lai ka'n harh hlawl mai chu a chhan ka hre lo hle a. Ka ngaihtuah ngial hnu pawh chuan a chhan han puh tur ka hriat loh em avang chuan ka muthilh tawh loh vanga harh ta-ah ka inngai ta hmiah a, ni ngei pawhin a hriat. Sana ka'n en a, zing dar 5 a lo ri dawn tawh reng mai. Mumang pawh neih hma hawta zing lo ni leh ta mai chu ka ngai thiam lo fu. Hnuailam ka'n bih zawk a, Roduhawma pawh veilam delhin a lo la mu tui viau mai. A pu harh hma avang liau liaua Roduhawma mu tui lai kaihthawh a ngai tur chu ka lainat ru viau a. Muangchang chuan ka tho chhuak a, pawnlera din to pah chuan Roduhawma chu ka rek chhuak nawk nawk a, ka'n thin harh te te hnu chuan nizan lama ka Thingpuisen in zawng zawng chu var sar hian ka khawh chhuak ta hiau hiau mai a. Thingpuisen ka in nasat tehreng nen, chutia var sara ka zung ta chu ka Thingpuisen in zozai kha thisenah a kal nihmiang ka ti mai a. Thingpuisen chu thisen siamna'n țha dawn riau hian ka hre ta.

Khawchhak lam chu ka'n thlir vang vang a, ni chhuak tur pawh a rawn bungbu vu tawh hi a lo ni a. Zingkar Sava hram thawm nen, boruak a nuamin a zangkhai em em a, a ropuiin hmuhnawm ka ti viau mai. Lungleng mi te chu ni ila Hlado han chham vang vang mai te pawh ka chak deuh reuh a. Mahse, Hlado chhamna khawp lunglenna rau chuan mi phuar der si lo. Roduhawma pawh a hmun ngai ah, a duh dan dana awm tur chuan zihkawngkhar chu ka khar hnan leh ta hmak a.

Chutia ka din kak deuh țai lai chuan ka din dan pawsi vel chu pa ta riau hian ka hre pek a. Mitthla-ah Wild Bill Hicock te, Doc Holliday tih vel an rawn lang iai iai a. Ka mitthla chu suangtuah zuiin ka suangtuahna mitthla-ah chuan Saloon kawt tual vaivut karah chuan Misualpa chu a lo ding paw thuk mai a. A pistol chu a hmang chak tih leh phawi mai pawh a inring hle tih hriat tak hian a kuthmawr te chu a phu dat dat a, a lung pawh a phu nasa viau nghe nghe. Tual vaivut khu luih luih avang chuan amah chu ka hmufiah hlei thei lo a. Chutia ka mitthla hmuhfiah tuma ka suangtuahna ka bih ngur ngur lai chuan ka pum ri rawk rawk thawm chuan mi tiharh zawk a. Suangtuahna mitthla chu kalsanin Inchhung lamah ka lut leh ta zawk a.

Țhutthlenga Sipai pensawn țhuta țhut auh pah chuan Thingpuisen chu MUP No; YMA No ang chiah, hmana kan Ina MUP kalkhawmin an theihnghilh hmang chuan ka vei tlak karh karh a. Chutih pah chuan kar hmasa chhuak Chanchinphek, 'VAWIIN AW' tih chu ka chhiar pah nuap nuap a -

LADY DIANA A THI : A va rei tawh ve le ! Kan chanchinphek siamtute hian an hre ve chauh anih dawn hi. Lady Gaga hi a nau a ni thei mai ang em tihte chu ka ngaihtuah tel nuap nuap a.

INDOPUI 2-NA LEH UID: Engtin tak inzawmna nei ang maw ? Hmm ... chhiar kân phawt te'ng.

TV. HAUSIAMA'N THIH THLENGIN BAWNG KAWLH SUAL A NGAM: Uhausiama lah hi, inla pa ve ropui bawk si. A ngam tak tak awm lo em mai. Ani ai chuan Urosiama pawh a huai zawk ka ring fan a.

KEI, SAHDAH LEH SAWRKAR HMASA - Rualaua : Ehiau !! Pu Rualaua chu(h).

Kan la hre țheuh awm e. Khatia Pu Rualaua sahdah ngei tumin a thlakna'na tuibur a hmuam tak thu leh, nghei tak tak thei si loa a pahniha a tihkawp tak thu tehkhinna'na hmanga Upa Sawma'n sermon a thlak hnua Pu Rualaua thinrim Ruling Party-a a inpek thu kha. Khami boruak kal zelah khan Pu Rualaua chuan Politics a lo luhchilh chho ta hi a lo ni a. A sahdah hmuam chhan leh a heh em em chhan chu Sawrkar hmasa tihdik loh vangah a rawn puh thlu der mai hi a lo ni. Tunhma chuan Sahdah pawh a hmuam ngai loh thu te, Khaini char char a hmuam zawk thu te, a khaini hmuam tirh chuan Khaini bura Vaipa lem pawh hian hmuihmul a la neih loh thu te a ziak lang bawk . Chutiang khawpa Khaini hmuam nasa ni si, Sahdah heh em em a nih leh theih chhan chu thiam tak maiin Sawrkar hmasa tihdik loh a nih zia a sawi uar hle. Hemi chungchangah hian tun Sawrkar hian mawhphurhna a neih loh zia te, Upa Sawma'n Pulpit tlangah meuh Sawrkar zu zawrh leh a sahdah hmuam a rawn hmehbel kual vel chu thu belhchian tlak loh anih zia te, a kaikuang ber zawn a țul anih chuan Sawrkar hmasa-ah kan chhui luh ngei a ngaih tur thute chu a sawi uar viau mai.

He a thu ziak hi Paty lam paw'n an pawmpuiin an thlawp a ni tih hriatna'n Unit President-in hming a sign hnan thlap bawk. Amaherawhchu; hemi avang hian eptu lam party erawh an lungawi lo hle a. A ranga rangin 'PU RUALAUA SAHDAH HMUAM CHUNGCHANGAH KAN PARTY HIAN MAWHPHURHNA A NEI LO' tih thuchhuah an siam nghal a. Hmunpuilama an hruaitute pawh chanchin an hrilh nghal vat a, an rawn ngaipawimawh viau nghe nghe. Eptu lam Party lungawi lo chuan dik lo taka an Party puh chhetu leh tihmualpho tumtu Pu Rualaua thlalak chu hal an tum ta a. Mahse, tuma'n Pu Rualaua thlalak an lo nei si lo. An han zawn ngial hnu paw'n Pi Selthangi thih nia thlanmual panna kawnga hnungzawnga a lanna chiah chu an hmu zo a. A thla lak sak tum chuan an hel an hel a, amah Pu Rualaua lah pawn a chhuak duh der bawk si lo. Chutiang chuan Ruling party leh Eptu Party, Pu Rualaua te inkar boruak chu a lo sosang nasa mai hi a lo ni a.

Chanchinphek ka chhiar zawha Thingpui te ka in zawh meuh chuan Ni pawh a lo lawr thui ve tawh hle a. Ka Nu leh Pa pawh chu an rawn tho chhuak ve țaih țaih ta bawk. Ka nu chu mei chhem tum chuan tapah chuan a kun kat kat a. Ka pa tap kila țhut tum chu a kawngna a chhuak zawk a ni chek a ni ang chu; a eu zawk a, ka nu kun kat kat mawngah tak chuan a chhir ta zawt mai le. Ka nu chu a bu dawrh a, a thinrim hmel hle. Mei chu a chhem tau sawk sawk a, vut te chu a leng chuai chuai a. Ka nuihza insum tuma ka lo insangphek lai tak chuan ka pa chuan, "Rovung, i tho hma ve anih te chuan mei tal te chu lo nun ve ta che. Tihtur hrilh reng ngai mai, hrilh chhun lah tidik thei bawk si lo. Ka vaw ..." a tih lai tak chuan pawnah ka chhuahsan ta daih a. Pawn ka chhuak chiah chu Vai Chhangkawt lo lut tur nen kan intawk chiah a. Ka pa'n a chetsual vang maia kei min hau ta daih chu lo thinrim ve bawk nen, Vaipa mawngah tak chuan ka'n pet zawt mai a. A pai uan uana kawngkhar bawh chuan a thal zui ta țhak a. Ka hlauthawng leh hnuhnawh chu kawmthlang lamah ka lim thla zak zak a. Vaipa pawh chu a lo hlauthawng ve ngang a ni ang, rem leh rem loa a chhang kawh pah chuan kan In piahlamah chuan a lim phei ve zak zak bawk.

Chutiang chuan hun leh ni te an ral ve zel a. Keimah leh chhungkua-ah pawh harsatna em em awm lo chuan kawmtawp Masi te pawh hlim leh dam tlang takin kan hmang zo a, kum pawh a thar leh ta mai. Amaherawhchu; kum chu thar eng ang mahse thingtlang nun leh khawsak phung erawh tharin danglam ve thut hek lo, dan ngai tein thlawhhma zau hek hawk valh a, buh kham tharchhuah tuma tha tawpa beih leh chu a ni leh mai. Hlo thlawh țul vanglai leh fur chhiat hun a inrual leh ang a. Kumhlui anga ka hnathawk peih lo ka teihawi ang mai mai kha a tih chi tawh dawn si lo, hna thawh țan hma hawtin tha a zawi nghal rawih rawih chu a ni ber e.

Thlai thar ve chhun ang ang pawh mahni paw'n ei țha phal lovin sum mamawhna avangin Aizawl lamah hralh atan kan han thawn liam ve a. Motor phurh man leh kharchhawngnu hlep țhat tumin min lo bum ve hlakna nen, hisap tling lo chiah chiah pawisa kan hmu let ve hram a. Chutah, Sawrkar ațangin huan nghet siam leh sum chang thlai; thlai ro tling leh daih rei tur chi min rawn sih hmuh a. A bulțanna tur sum neih loh chu thuhran; a chi chhe ber chi emaw tih mai tur min han supply zui a. Beiseina sang tak nen kan ram neih țhat țhatah kan hung ve fir fer a. Mahse, chu chauh chu a la tawk zo si lo. A puitling thei ang em tih pawh hriat loh kha a puitlin hun nghah chhung atan ei leh in, sum leh pai leh mamawh dang kan lo nei ve țhin tho si. Kan ram la neih chhun chhunah Buh leh thlai dang kan han ching leh a, a hahthlak dan hi a thuah hnih teh a sin. Chutah, mithiam inti an rawn kal leh a. Vai rama an zir dan leh khawi emaw hmuna an tihchhin dan hmang in, kan khaw leilung leh nihphung zir chiang hawt si lo hian a țhat duh dan, a tih dan tur .... min rawn zirtirin kan tih ve dan an rawn paihthla dêr mai a. Beiseina nen bawk kan han ti ve leh a. Mahni ei khawp țawng țawng bakah țhenawmte pek tham loh vel chiah chiah kan thar ve leh hram a. Hetiang reng reng hian keini thingtlang mimawl, a tam zawk hi chu kan kual kumtin anih mai hi maw.

Beisei tur dang leh hmalakna hran hre ta lo chu ka Usangliana nen chuan Sazukmual ramah chuan țin thum hmun chu kan han valh ve leh ta pawp a. Hmabak a ko leh bar bar dawn kher mai. Lo te halin Buh tuh te pawh a hun chho ve leh ta mai a. Phur lo leh thatho lo zet chungin Usangliana hnungzui chuan Buh tuhin ram kan riak dun ta tlauh tlauh mai a. Chhun ni sat vanglai tak tak phei hi chuan Khawmu an tih hian min rawn chawi daih se ka ti rum rum țhin. Ka Usangliana lah, thâwk rîk suk suk pah chuan a thawk buan buan mai si a, hah chu dam lo tak hi a ni ringawt.

Engtin tin emaw chuan Buh pawh kan tuh zo ve leh ta reng mai. Kan zawh ni chuan kan tlai deuh avangin haw chhuak nghal rum rum loa a tuka muangchanga haw tum chuan ramah chuan kan la riak a. Ka Usangliana chuan Buh tuh zawh lawmna'n Vahrit kai kah tur zawn paha Sava riak ngaihthlak pah chu a tum ta a. Kei lah, mahni chauha thlama awm chu ka lo zuam lo nasa mai si. Usangliana chuan phur lo hmel fe chuan min hruai ve ta nge nge a.

A Vahrit veh tumna hmun kan thlen chuan tah hian lo awm rawh tiin Changel hung karah chuan mi țhut tir ta a. "Thawm nei reng reng suh ang che" tih pah chuan ka chhaklamah chuan a liam chho ta daih a, ka hril a hai viau mai. Ka rilru te te chuan, "Ka Usangliana hian min bum a ni chiang mai. Min ning ang a, tah hian min awm tir anga min kal san daih a tum a ni ngei ngei ang. Nge, Sava chawchah atan min hman a tum zawk em ni ? Hetia Changel hung kara ka tawm kuk lai hian Mulukawlh rual rawn thlawk ta se ... min ei ta se ... chu chu Usangliana hian lo kah a tum zawk em ni ang ? Nge, sava chang tur anga insawiin Savawm a chang zawk ang a, Savawm chawchahah min hman a tum zawk le ? Sakei lo kal ta se ...."

Khua lah chu a thim chhulh tawlh a. Ngaw hnuaiah phei chuan mit a vai ram ram tawh. Thil ni lo pui pui ngaihtuah a awl țan ta viau mai. Josefa a unaute'n Khuarkhuruma thlaka an hralh daih ta ang te kha ka țhutna Changel hung kar chep zet ațang chuan ka inchan vel a. "Ka Usangliana hian engtin emaw taka min tih chu a tum chiang a ni." ka ti rilru mawlh mawlh tawh. Khua lah chu a thim chu a ni ta mai. Thil ri set set leh ri deuh rek rek hriat tur a tam țan ta. Ngaihtuahna chu a vak kual zut zut a, hriat duh loh pui pui a hai chhuak nawlh nawlh mai bawk si. Chhei le ! Pi Vanbuaii thihna kha a la rei miah lo. !!

Chutianga awm reng ringawt chu a țhain ka hre ta lo. Ka țhutna ațang chuan ka tho țhum țhum a, chhaklamah chuan thawm nei lo tur ang ber chung chuan ka vak chho ta hrut hrut a. Bawkkhup titih, țhingțhi deuhreuh chung chuan thui fe chu ka vak chho ta. Chutah, ka hma-ah chuan hnimbuk che leih leih leh thil dum nul nul ka va hmu ta ! Ramsa anih loh paw'n Ramhuai tal anih chu ka ring khawp. Vawt ur ur e ti lo chuan ka thlan chuan mi bual lum pup pup thung a, ka thaw te chu a chham titih der mai. Ka hma-a lungtum lian angreng tak chu ka la a, ka hum nghet salh salh viau mai. Ka hma-a thil dum nul nul, che leih leih reng chu eng nge anih chiah chian tuma ka melh leh lai tak chuan a rawn che leh hrut a, a awmna ațang chuan êng zung mak danglam tak chu a rawn êng chhuak ta zawk mai !! Ramhuai a ni chiang lutuk, rinhlelh rual a ni ta lo. Ka theihtawp bakah ka theihtawka na chuan chu Ramhuai dum nul nul chu ka lungtum ken chuan ka vawm ta dawt a. Chutih rual chiah chuan Silai a puak thawr a, țe riin a zui nghal zat bawk.

Silai puak ri ka hriat takah chuan Ka Usangliana'n min rawn chhan hman a ni tih hriain ka lawm viau a. Mahse, Usangliana na tuar rum ri ka hre zui ta tlat ! Hlauthawng tak chung chuan a thawm ka hriatna lamah chuan ka tlan thuai a. Usangliana chu hnim kar titihah hian a lo kawm chal chal mai a. Hlauthawng tak chung chuan, "Ka U ngatinge ... Ramhuai khan a seh hman che em ni ... a power êng khan a chhun che a mi ... ka vawm fuhin ka hria, a țe thawt a, a reh zui hmak mai." ka ti khur hlawk hlawk a. Usangliana chuan thei leh thei lo, thinrim awki tak mai hian, "Ramhuai a awm lo ... engvanga mi rawn vawm ngawt nge i nih ? Mawl leh lutuk ROVUNG.. Power êng pawh a awm lo. Ka Torchlight ka hmet eng anih kha ... Vahrit kah tumin ka chhun chiah anih kha, laktlak loh lutuk." tih nang nang pah chuan a na ti chu a țhen chak chak a. Ka inthiam loin ka Usangliana chu ka khawngaih ru khawp mai. A reng rengah hmun hrana min awm tir lo khan a bulah min kal tir ve se a țha nimai tur, ka hlauh tehreng nen.

Usangliana pawh a Khêl ruh ka vawmna avang chuan a kal bai awi awi a. Ani ber thawk thei lo bawk nen, Buh tuh ber kan zo ve tawh bawka hna em em nei lo chuan ni hnih khat chu kan han hahchawl ve ren rawn a. Ka chet ve hlek leh ka tel ve apianga ka tum ni bik miah loa thil pawi a thleng ziah mai chu a hrehawm ka tiin chhungte bulah pawh inthlahrunawm ka ti ve tawh khawp mai. Chumi zan pawh chuan chhungte bula awm ve reng nuam ti si lo, lenna tur hre bawk si lo chu ka pa țingțang tuk chawp, lian zet mai nen chuan kawmchhak lamah ka inhung chhuak ta daih a. Thla pawh a eng vei toh toh a, Usangliana pawh a lung a leng a ni ang, kan Tape recorder hlui tawh zet chu a zai tir ve țang țang bawk.

Phuihnam kung ngheng chuan Uliansanga te In lam chu ka hawi thla vang vang a. Zozial liantawk pak khuk hluah hluah pah chuan Țingțang se dâr tiat chu ka kuah vei hlu hlu a. Țhingdup bit ngei maia 'AN LUNG LENG VE NGEI ANG' tih hla chu sak ka chak tehlul nen, ka bit thiam miau loh avang chuan Țingțang hnunglam ka kuta khawn rik kurh kurh pah chuan 'AIGUPTA SABEL' tih hla chu Kel râwl tak meuh meuh hian ka Ui hur aupui ve chiam a, Pa Manga inkhawm kal tur chuan mi en duh viau nghe nghe. Ka sak zawh meuh chuan Biak In lam chu ka'n hawi thla a; Uliana pawh dar nawn tumin a Kamis var chuan a lo intuam dum ve ran a. Dar chu vawithum a'n khawng bal bal a, inkhawm chu an țan ta.

Chutih lai chuan ka Usangliana paw'n MLTR hla, 'BREAKING MY HEART' tih chu ngaithlain uluk leh tihtakzet, rilru chhungril zawng zawng nen hian "Baking my heart Okhein" tiin a lo zaipui nasa mai a, a rilrua awm tur awm ang chu ka hre mai. Usangliana hian rawlthar tir tê anih ațangin ngaihzawn deuh leh duh em em mai Usawmtei hi a nei a. Usawmtei pawh chuan lo duh vein an inzui ve chawt țhin. Mahse, hmanni deuh khan Usangliana hian Usawmtei chu inneihpuiah a sawm a. Usawmtei lah chuan, "Inneih i rawt hma em mai" tiin a lo țhen daih hi a niawm a, Usangliana paw'n a tuar thiam lo viau nghe nghe. Min hmangaih lo em ni tia Usangliana'n a zawh chuan, "Hmangaih e" a ti mai a. "Ngatinge min țhen si ?" tia a zawh chuan, "Inneih i rawt hma em anih kha." a ti leh ringawt a. "Kan innei rih lo anga a nimai a lawm" tia Usangliana'n a thlem lah chuan, "Min neih i tum tak tak lo anih kha." a lo ti leh hlauh bawk si. Usangliana tan hian kawng a ping ve em bawk atin ni.

Usangliana chu ka khawngaih rilru reuh khawp mai a. A rilru nat lai anih vei nen; kei lah chuan Ramhuai emaw tiin ka lo vawm silawng bawk si. Engtin emaw taka hnem dan ngaihtuah chu a țulin ka hre ta a. Chu lovah, ka pain, "Heti ngawt zawng ațha lo. Aizawlah i ni te kan pahin i khel ruh chu va entir rawh" a tih avang chuan Aizawl kal a tum a. Ka tlawn fuh a, ka tihlawm phawt chuan min hruai ve duh ka beisei ta tlat. Chumi beisei leh hre ru ran chung chuan Usangliana bulah chuan ka va lut a, a bula țhut pah chuan pehhel ang reng deuh hian Usawmtei chanchin chu ka sawi ta a. Rilru na, lungawi lo leh thinrim te hi chu an thinrim chhan, an lungawi loh chhan leh an nat chhan te hi sawipui mai ila; thil dang sawipui phet tum hi a finthlak ber loh zia ka hre bawk a, a rilru hneh thei tur ang ber chuan Usawmtei lungleng hmel deuha tlanga a tlai ni lum ai lai ka hmuh thu ka phuahchawp hnu phei chuan a ngaihvenin a rilru a inhawng hmel viau ta mai.

Beisei ang ngeiin Usangliana chu a rilru no lai leh duap lai a ni bawk a, kan titi a kaltluangin Usawmtei chanchin chu kan sawi dun nasa ta mai. Chutia kan titi a fuh vanglai tak chuan a Aizawl kal tur chungchangah chuan ka pakai kawi ta zauh a. Duhtawka Usawmtei chanchin leh Aizawl zin tur chungchang kan sawi zawh meuh chuan Ka Usangliana chu ka tel lova Aizawl kal thei chi ziazang a lo ni lo a. Amah pawh kal thei țawng țawng chauh anih laiin keiin ka puih loh te chuan a tan Aizawl kal kha a ngaihna a awm thlawt lo. Bakah keimah vanga na tuar a ni a, a buaipui chu ka mawh ve liau liau anih zia thu-ah chuan kan lung a tlu rual hle. Chutichuan, Usangliana chuan Aizawlah chuan min hruai ve dawn ta chu a ni a. Tin, Usawmtei ta tur lehkhathawn hnutchhiah pawh a țhain kan hria a, lehkhathawn tur chu kan ziak dun ta a -

To,

Queen of my heart Sawmtei

Hma reng reng an tlai ngai lo tih thufing hi i la hre ngai lo nge, hla phuahtu paw'n, "Tlai luat hian pawina a nei ngai e" a lo ti mathlawn lo in, engvanga i tawna tlai luat hlau ariang vala hi "A hma em e" tih vanga sam ang mi țhen tak mai le ?! I tana tlai pawh inhuam em em hian hma taka ka thai changa'n ka duh che a, a rem lo anih paw'n a tlai ber ber pawh i tan ka ti a sin. Nang chuan Hma leh Tlai vang maiin hmangaihna chu sirah i hnawl ta si. Âw ... hma leh tlai a awm tawh loh nan he khawvela Sana zawng zawng leh hun leh ni chhiarna Calendar-te hi Pu Thangsiama chempui bo ang hlauhin han bo pil hmak thei se ka va ti em ! Mahse, hma leh tlai hriltu hun leh ni te chu a dan ngai tein luang thli chhem iangin an fawn dual dual reng si a le ! Hma leh tlai awm tawh lohna khawvel hi a awm ngai anih chuan, chumi hmunah ngei chuan hma lua leh tlai luat awm loin ka lo nghak ngei ang che.

I tana tlai leh hma inhuam rengtu,

Sangliana

Usangliana nen chuan lehkhathawn chu kan bih dun vang vang a, a țha kan tiin Usangliana lung pawh a dum hmel viau mai. A mitmeng ațang chuan Aizawla min hruai chu a tum chiang hle tih pawh hmu thei hialin ka inhria.

Usangliana berin, "Min kalpui rawh se" a tih miau avang chuan ka nu leh pa pawh chuan an hnial ngam bik lo. Ka pa pawh țum dang zawng ai chuan a ngaih a țha tih a hmel ațangin a hriat reng mai. Ni e, keimah chauha zin tur ka ni tawh lo a, Usangliana nen kan nimiau a tin ni.

Umarobert-a Sumo bawk chuan Aizawl lam pan chuan kan insawh chhuak ve leh ta boh boh a. Tunțum zet zawng Aizawl thlen zawh loh ka hlau ve tak zet zet tawh. Kawnglakah te chuan harsatna kan tawk leh maiang tih hlauin rilru țawngțaina te chu ka bei nasa ngiang mai. Sumo seat hnung berah chuan Usangliana nen kan țhu dun a. A lai lane-ah chuan Pu Rualaua te nupa leh Party President Pu Thanga te pafa an țhu a. A hma berah chuan Pi Hauchhumi; Motor ruih hrat zet leh an kawmthlang Pu Vantea nupui unau nu Aizawla awm, Pu Vantea te kana rawn zin, haw leh tawh tur chu an chuang ve bawk.

Pu Rualaua chu eng ti tura zin nge anih ka hre mai bik lo a. Mahse, Party President Pu Thanga nen an nih avang chuan Party thila zin tur an nih chu a rinawm. Pu Rualaua nupui, Pi Siamtei chuan Pu Rualau beng bulah chuan, " Motor chuanna-ah Sahdah leh Tuibur hmuam miah loh tur aw. Saw, Pi Hauchhumi saw Motor a rui țhin a nia ... a phunchiar bawk si, mi bulah a rel vak mai ang che. Insum tlat rawh" tiin a hrilhru sar sar a. Pu Rualaua chu a ngawi reng a. Thui fe kan tlan hnu chuan Pu Rualaua chu a insum zo ta ngang lo ani ang; a sahdah hmuam ruk tum chuan sumo tukverhah chuan a dak chhuak a, hnapkhir kheuh niawm taka tih vel pah chuan a hmui chu hma lamah a tipawrh deuh tarh a. Mahse, Pi Siamtei chuan a lo hmu reng si, a zahzel chuan a hnarkua chu a kawm a, a hahchhiau der ta vak vak a.

Umarobert-a chawlhna țhin Hotel kan thlen chuan kan chhuk sap sap a. A țhenin chaw kan ei a, țhenkhatin thil dang an lam nak nak bawk. Pu Rualaua pawh Hotel chhungah chuan a rawn tei lut ve zuk a. Mahse, a chhuak bo leh ta thuai a. Thil ei lai chuan Pi Siamtei chu a hawi a hawi a,"Khawnge maw i pa Ruala pawh chu a bo daih le" a ti nang nang a, keini lahin kan hre mai bik bawk si lo. Chaw ei kham chuan kan Sumo chu ka han pan a, Sumo phenah chuan Pu Rualaua chu a lo țhu tawm kuk a, tuibur a lo hmuam pung a. "Aa ... hetah a nimaw i lo awm. Nu Siamtei'n a zawng a zawng che a sin" ka'n ti a. Tuibur hmuam țawng po po pah chuan, "Motor chhungah hmuam a phal si lo a, ka hmuam ru anih hi. Hrilh miah ...." a tih lai tak chuan Pi Siamtei chuan a rawn hmu a. " I tuibur hmuam chak leh a nimaw i lo bikbo ni. Chhak la, thil zuk ei ve vat rawh." tih pah chuan a kai thla dawr dawr a. Pu Rualau pawh chuan a tuibur hmuam pik puat pah chuan a zui dat dat a.A rawn hawi let a, lai leh zak hmel fe-a nuih vun vun pah chuan Sahdah chu a'n hmuam ru leh hram a.

Harsatna leh buaina hran awm lem lo chuan Aizawl chu kan thleng dawn ta reng mai. Ralkhat ațang pawh chuan Aizawl chu a lang pe tuar(h) tawh. Usangliana nen chuan thlen thuai thuai kan chak rual rualin kan huphurh ru dun khawp mai. Diktak chuan kan unau hian Aizawl kan kal khat hle a. Kei chu ka kal hnuhnun ber chu ka naupan lai daih tawh a ni. Usangliana erawh a intih tlangval tirh lam hian ka Nu nen ha phawiin an kal. Ka hriat dan chuan ka ni te In chu; an kawmthlang te inchung a sen a, chumi te kawmthlang lehah chuan Ui lian deuh a awm. Usangliana erawh chuan ka ni te In chu step sir, tuihawk luankawr bul a ni tih a chiang hle thung.

Aizawl chu kan thleng ta hlawl mai le. Motor a tamin In lianpui pui mai te chu an ngir khup mai si a, tha a khur țan titih der mai. Ka ni lahin min lo hruai thei dawn bawk si lo. Umarobert-a chuan Ngaizel thleng chauh a tlan tur thu a sawi avang chuan Ngaizelah chuan kan chhuk ta vek a. Midangho chu midang karah chuan an bo zo ta vek mai. Ka thla a phang ruin ka zam rilru viau mai a. Mahse, ka Usangliana a la awm tal a lawm le. Usangliana erawh a zam lo nasa mai a, hria a inti viau mai. Ngaizel ațang chuan Bus-ah kan chuang phei ta a, ngaih ațha țan.Tunah chuan Aizawl kal kan ni tak tak ta.

Khawpui chhung kan lut zel a, pui kan ti dun ngei mai. Nakinah chuan Conductor chuan fare a rawn khawn ta a. Kan zawn a rawn thlen chuan Usangliana chuan, "Engzat tur nge ?" a lo ti há a. Conductor chuan, "Ka hre bik nang. Khawiah nge in chhuk dawn?" tiin min zawt a. Usangliana chuan ngaisang lo hmel zet leh thinrim hmel lek lek hian, "Stand-ah aniang chu. Stand lovah chhuk in phal reng reng em ni?" a lo ti deuh hlar a. Conductor chu a thinrim hmel viau mai a, vin fe hian, "Khawi Stand berah nge in chhuk dawn" a ti leh a. Usangliana lah chuan a hma aia pawr mah chuan, "Ka hre bik nang. Kan chhukna hmun tur pawh kan la thleng lo a, engtin nge ka hriat ngawt ang" a ti ve leh hlar a. Conductor chu a beidawng ta a niang, "Hmmm ... in chhuk dawnah min pe mai dawn nia" tih pah chuan a kal san ta daih a. Usangliana chuan, "Khatiangho kha chhan țhat duh vak tur an ni lo. Min bum a, chuan man tam deuh min lak sak a tum anih kha" a rawn ti sap a, Usangliana chu fing ka tiin ka ngaisang kher mai.

Usangliana chu Bus kawngkhar ațang chuan a hawi a hawi a. Kan chhukna tur chu thleng har ka inti tawh viau mai. Rei tawk fang kan chuan hnu chuan Usangliana chuan kan thlen tawh thu chu a rawn sawi a. Amah vek chuan, "Helai hmun hi chu ka chhinchhiah ve chiang em !" a ti zui bai bai a. Chhuk pah chuan Conductor chu engzat tur nge tih a va zawt leh a. Conductor chuan, "Khawi ațangin nge in chuan kha(h)?" a lo ti leh a. Usangliana sawi ang tak tak khan he pa hian min buma pawisa min chawi tir țeuh a tum ni chuan ka hre ta tlat a. Vin zet hian, "Stand ațangin. Stand lo ațangin chuang se min ti a mi ? Stand-ah bak din pawh in din loh kha. A chuang zawng zawng hi Stand ațangin an chuang vek, stand-ah an chhuk vek bawk ang. Ka chhinchhiah vek" ka lo ti vin hlar a. Conductor chu a hrilhai hmelin a thin pawh a rim hmel viau mai. Min melh run run pah chuan, "Mmm ... chhuk mai teh u. Pawisa pawh min pe lo mai r'u" a ti ta a. Chutia a han ti chu Usangliana chuan min hmusit a ti tlat bawk si. Chhuk pah chuan, "Duh chuan kan hek thei che" te kan ti vel a.

Kan chhukna hmun chu Chanmari a ni a, ka ni te chu Mission Veng mawnga awm an ni thung. Mission veng mawnga kal tur Chanmari-a kan kal ta daih chu a mak hmel viau maithei. Mahse, Ka Usangliana hian hmâna Ka nu nena Chanmari Bus stand ațanga Ka ni te In thleng ke hlira an kal dan kha a la hre vek a, chutiang chuan tunah pawh kan kal dawn a ni. Chanmari ațang lo chuan khawi hmun ațang mahin ka ni te In kal dan chu Usangliana chuan a hre miah lo a, kei phei chuan hre lo tak ka ni.

Chanmari ațang chuan Mission veng pan chuan ke ngatin Usangliana kuah chung chuan kan kal let leh ta a. Kal pah chuan Bus Conductor mawlzia leh phakarzia chu kan sawi dun a. Bus-a chuang hrim hrim chu stand ațanga chuang leh stand-a chhuk tur vek an ni tih hriat sa reng laia min han zawt kher te kha min bum a tum ngei niin kan ngai nghet tlat a. Khatianga mi a bum fo chuan a hlep țhat țhin turzia te kan ngaihtuah a. Usangliana chuan Primary zirtirtu hlawh erawh a la țhat hret a rin thu te pawh a sawichhuak nghe nghe. Tin, kha Conductor khan a hre lo tak tak anih phei chuan a mawl dawn hle hian kan hre khawp a. Ani ai thlawt chuan Conductor tlak zawk hliah hliahah kan inngai unau ta hmiah mai.

Nakinah chuan In sangpui mai bula kawng peng țhuam chu kan va thleng ta hlawl a. Usangliana chuan, "A hnuai berah hian kan kal a. Zion phihrit(Street)-ah dawr ak ho pheikhawk bun uih rehna zawrh kan lei a, a chhak step-ah kan chho leh" tiin hmana an kal dan chu a sawi zat zat a. Usangliana chu thil hre rei thei ka ti kher mai.

A sawi ang chuan Zion phihrit-ah chuan kan chhukthla ta a. An thil leina awm vel kan thlen hnu chuan let chho lehin a chhaka step-ah chuan kan chho a, Damdawi In thlang kawngpui chu kan chuangchhuak leh ta. Damdawi In lam chu kan hawi chho vang vang a, Usangliana chu han inentir nghal mai pawh a țha kan tih rual rualin ka ni te In thlen phawt chu țhain kan hre leh ta zawk a. Muangchang chuan kan inchhawm phei leh ta bek bek a.

A piah maiah chuan lei(Bridge) lo indawh zui mai chu kan hmu ta ! A ropui kan ti dun kher mai. Aizawlah Step kal thei a awm an tih țhin kha ni ngeiin kan ngai ta a. Chuan ve chhin chu kan chak rual rualin kan hlau deuh bawk si, chuan man lah a lo to phian thei. Mahse, Usangliana chuan sawi ve reng rengah chuang chhin ang a tih avang chuan chuan chu kan tum ta a. Mahse, chuan man han pek mai na tur kan hmu bawk si lo. A man pe loa han chuan ngawt lah a fuhin kan hre bawk si lo. Usangliana chuan, "Mmm ... nakinah kan la chuang mai dawn nia. Ticket lak lawk a ngai anih ka ring. Tuna chuangho pawh khi a hma ațanga ticket la lawk vek an ni tawh ang. A ticket counter awmna ka ni kan zawt dawn nia." a tih tak avang chuan Step kal thei ni ngeia kan ngaih chu kan kal san ta a. A piah leh deuhah chuan chutiang step bawk chu kan va hmu leh ta ! Usangliana chuan, "A va service tawi ve maw le. Mahse, a chak țha anih hi, min thlen khalh daih a lawm" a ti nang nang a. Ka rilru te te chuan, "Ka infit țhat lai ni se, ka tlan khalh hman hrim hrim ang." ka ti rilru neuh neuh a.

Kan kal leh hret a, Pu Gandhi-a lem lianpui mai chu kan va hmu leh ta. Usangliana nen chuan ropui kan tiin vanvadak meuh chuan kan thlir dauh dauh mai a. Usangliana chuan chek tlak tlak pah chuan, " Tute Quary lung tak hmang ang maw ? An hralh to viau ang chu" a ti charh charh a. Ka naupan laia ka hmuh ve kha chuan Pu Zoramthanga lem nimai khan ka hre si a. "An lo thlak tawh anih dawn hi" ka ti rilru neuh neuh a.

Vanapa Hall kan thleng phei leh a, a kawtah chuan Pu Gandhi-a lim te chi hi an lo dah ve a. Usangliana nen chuan dinchilh meuhin an siam ang lo lutuk chu kan nui tlawrh tlawrh a. A siamtupa chu hre lo mah ila kan nuihsawh dun khawp mai. Gandhi-a lem hetiang em ema ang lo lutuk hi kan la hmu ngai lo bawk a, rei fe a bula ding chung chuan kan nuih vak vak a, a tawpah chuan thlan sa phungin kan kal san thei ta hram a.

Chutiang chuan engtin tin emaw Mission veng chu kan inpal thleng ve ra rawih mai. Usangliana paw'n ka ni te in peng chu a lo la hai lo nasa mai a. Step tawp thleng kan chhuk hnu pawh chuan thui fe kan la chhuk leh ngat ngat a. Chutah dinglamah kan peng thut a, ka ni te In chu kan thleng chu a ni ta mai. Ka ni te Inah chuan mi an lo awm deuh țaih a, a țhen chu pawnah te pawh an țhu. In chhung lamah chuan an ri deuh mur mur bawk a. Ka Usangliana nen chuan kan inen he haw a. Karei !! Ka ni hi a thi a ni chiang lutuk. !

Usangliana chuan a Bag ah lai chu mi pe lawk a. Thei leh thei loa bai sawih sawih pah chuan a hmai a hup a, "Ka Nii ... Kan rawn tlai a nimaw ... A va'n pawi tak em ! " tih pah chuan inchhungah chuan a bai lut sawih sawih a. Keipawh chuan Bag ak puar luah leh pawm țu chung chuan ka zui lut ve bawk. Usangliana chuan inchhunga awmte'n an lo kil bial deuh laih chu va keu sawt sawt pah leh ring zet a "KA NÎ" tih leh va bawh a rual ta a. Inchhunga awm te chu an thum deuh hak a, mak ti hmel zeta min en pah chuan an hawihai hmel fu hlawm mai. Usangliana țap pawh a bang hmak a, ka va en nak chuan a hmai leh nghawng, a kut velah te chuan eng emaw hi a lo kai berh luai mai a, a ngaihna ka hre lo viau mai. Chutih lai chuan ka ni ngei mai chu a rawn lut ta, Usangliana nen min kaih pah chuan thil awmzia te sawiin thupha te a chawi luam a, kan chhuak zui ta a.

Usangliana'n ka ni te In emaw tia a țah luhna kha ka ni te In awzawng a lo ni lo a, an țhenawm te In zawk a lo ni a. Kan lut tur pawh tukverh ațangin ka ni chuan min lo hmu reng a, min koh kan lo hre lo mai mai zawk hi a lo ni a. Țhenawmte chuan an naute Birthday an lo lawm hi a niawm a. Birthday cake zai tuma an lo bial tuau tuau lai tak chu Usangliana chuan a lo va bawhpherh sak hi a lo ni a. A zia lo kan tiin kan zak ve hle mai.

Ka ni bawh beisei ai maha țhain kan hmu a, kan lawm kher mai. Zual lam pan loin țhat lam a lo pan ve zel hi a lo ni a. Amaherawhchu; hna em han thawk tur chuan a dam a la pan em a, chuvang chuan, "In rawn kal ta sa sâ, tu emaw zawk zawk hian min awmpui rih aniang chu" tiin chaw ei lai chuan a sawi siam siam a. Ka Usangliana chu tlawn lungawi thiam a țul leh hle dawn hian ka lo hre hman a. Mahse, ka ni vek chuan, "Sanga zawng, in lamah hna fawng vuantu ber i ni a, i awm loh chuan an buai awm si a. Vungtea hi awm rih mai se la a țha ang" a tih leh tak avang chuan thawven dan a veng chiang ta khawp mai.

A tukah chuan Usangliana khêl ruh na entir tur chuan Damdawi In lam chu kan pan dun leh ta hnak hnak a. Bus-a kan chuan chûan kan bo kan hlauh bakah Conductor mawl leh phakar deuh an awm leh kan hlauh avangin ke bawk chuan Damdawi In pan chuan kan inkuah phei leh ta bauh bauh a. Thlan sa phata Damdawi In kan thlen hnu chuan mi tih dan entawn leh zawt chawp chung chuan OPD Card chu kan la chhuak ve ta mai a. Card min petu chuan, "Ortho-ah in kal dawn nia." tiin min han hrilhfiah ve nasa teh nahse keini tan chuan Ortho emaw, Ertho emaw, Depthraw pawh ni raw sek sek, kan hriat loh dan leh kan hriat dan a inang reng mai.

A ngaihna hre lo zeta kan hawi kan hawi lai chuan Pitarte pakhat kal bâi seih seih hi kan hmu fuh ta a. "A khel ruh a na a ni ve chiang mai. A kalna tur leh kan kalna tur pawh a inang hrim hrim ang" ti chung chuan Pitarte chu kan zui ve ta ngawt a. Pitarte kalna-ah chuan kalin lehkha te chu kan thehlut ve ta a. A ziaktu lah chuan en mang hlei lo hian a lo ziak ve mai bawk a. Usangliana nen chuan a hming an lam hun nghak chuan ka țhu ve ta ran mai le. Nakinah chuan Usangliana hming chu an rawn lam ta; thei leh thei lo chuan room chhungah chuan a bâi lut saih saih a. Mahse, reilote-ah chuan hrilhai hmel zet hian a khel tuai vut vut pah chuan a rawn chhuak leh ta mai a. A ngaihna hriat loh hmel zet hian, "Ha entirna hmun a lawm." a ti ta.

"Doctor khan lokal rawh le a ti a. Ka va kala ka khel hi ka hlim a. I khelah i ha a țo em ni mi lo ti vin deuh hlur a. A țo leh țo loh chu ka hre miah lo. Ka nauin mi vawm palh a, chumi avang chuan a țo pawh a ni maithei. A hrim hrimah khel ruhah ha a lo țo thei a nimaw ?! ka ti let hú a. I mawl lutuk, tu khel ruhah mah ha a țo ngai lo. Chhuak rawh, hei chu ha entirna hmun anih hi." min lo tia tiin beidawng leh hamhaih hmel zet chuan a sawi ta a. Usangliana chu ka khawngaih rual rualin ka nuih a za ru viau bawk si. A tawpa tawpah chuan kan inentirna tur Ortho ngei chu kan hmu ve ta. Mahse, mi an lo tam tawh kher mai. Nghah rei ngai lutuk tur chu ka huphurh ru khawp mai a.

Ka Usangliana bulah chuan, "Haw'h, a chhak building-ah khian chho chhin ang, inentirna tur dang pawh a awm maithei a sin" ka ti a. Usangliana pawh chuan a lo duh ve mai a, building chhak zawk lam chu kan pan chho ta a. Kan thlen chuan Gate Duty bulah chuan, "Khawnge Ortho" tiin kan han zawt a. A bul mai room chu min kawhhmuh ta a, rinai takin a awlsam dawn phian mai. Room chhung kan va luh chuan Doctor hian Damlo a lo en kual mek hi a lo ni a. Damlo ho lah chu hahdam leh nuam hmel fé hian khumah an lo mu far mai bawk si; Usangliana nen chuan kal fuh hi kan inti khawp a. Kan inen a, kan nui leh ringawt țhin. Ka rilru te te chuan, "Hetiang tur hi a ni reng a ni. Kan sawrkar pawh hian Damlote tana inentirna nuam leh hahdam zawk hi a ngaihtuah a ngai reng a ni. Tunah pawh hma an la nasa hle mai, lawmawm tak a ni." tiin ka ngaihtuah neuh neuh a. Usangliana pawh Doctor en hmabak khum awlah chuan hahdam hmel tak hian a va mu zar a, nuam a ti hmel khawp mai.

Doctor chuan Usangliana zawn chu a rawn thleng ta. A ngaihna hriat loh hmel zet chuan nurse nen chuan an inmelh zawr a. Chutih pah chuan, "Hei, eng nge in awmzia?" a'n ti a. Usangliana chuan a kut lukham atana hmang at chung chuan awlsam fe hian, "E le, ka inentir dawn" a ti sam et mai a. Nurse chuan vin lek lek hian, "OPD - ah kal ta che u." a'n ti deuh hlak a. Usangliana lah chuan rang zet hian, "Kan kal daih tawh, lehkha pawh kan nei" a lo ti leh var a. Doctor chuan hrilhai hmel fe-a mi en pah chuan, "Chuan, an admit chu em ni?" a ti leh a. Kei chuan rang zet hian, "Admission tih tum pawh kan ni lo, inentir tur kan nia" ka lo ti vat a. Doctor pawh chu a bei a dawng ta deuh a ni ang,"Umhh ... Khawimaw, ka lo en mai ang che" tih pah chuan Usangliana chu a nat dan te a zawt ta a. Lehkha-a eng emaw a ziah hnu chuan, "Khuti laiah khuan X-ray zuk ti phawt ula, chumi result chu kan en leh dawn nia" a ti ta a. Usangliana nen chuan X-ray ti tur chuan kan inkuah thla leh ta hnak hnak a.

X-ray ti tur chuan ti ve tur dangte nen chuan kan țhu ta țhap a. Rilruah ngaihtuah a thuiin suangtuahna a kal thui duh khawp mai. A chhan chu; X-ray chu eng nge anih tih kan hre ve tawh tlat. Hmanah kawmthlang nu Pi Sapchhungi an X-ray tawh a. A sawi dan chuan X-ray chu thlalak lianpui, taksa chhungril zawng zawng nen fiah deuha lak theihna a ni. Tin, thlalak dawnah thawmhnaw phelh te a ngai bawk. Usangliana chuan a khabe hiah noh noh pah leh hnuailam bih ngar chung chuan, "Tukin khan lo inbual hram ila aw" a rawn ti chuai deuh raih a. A rilru tur awm chu ka hriatthiampui viau mai.

.

A khel bawr thla an la anih chuan a mawng leh kap bawr vel te pawh chiang takin a lang ngei ngei ang a. Thawmhnaw phelh chu thuhran ni se; taksa chhungril ber pawh la tlang vek thei khawpa thlalakna țha-ah chuan a bal lai te chu langsar duh tur tak chu a ni. Usangliana chu khawngaihin huphurhphui viau mah ila a lehlamah a thlalak chu ka en chak phian mai a. Chiang tak maia a thil a'n uai ngóh mai tur te, a ek tur zawng zawng a mawnga rawn inhnawh țun, thlalaka an lang vek mai tur chu ka ngaihtuah a, ka hmuh chak rual rualin ka nuih lam lam te chu a za ta a. Usangliana lah nichin ațang tawhin ka ek a chhuak a ti reng tawh bawk si. A thlalak chu pui dawn viau hian ka hria a. Bialnu te erawh en tir chi a ni hauh lo thung ang le.

Usangliana pawh a hun a thleng a, thla te la zoin a thlalak chhuah hun chu kan nghak dun ta ran a. A tawpah nula pakhat hian a rawn keng chhuak ta va va a, Usangliana chu a zak kher mai. Kha nula khan a thlalak kha a hmu vek ngeiin a rinawm tlat. Hmun fianrial, tuma hmuh theih loh turah chuan Usangliana chu ka din hliah a, hawi tawn zak zak pah chuan a thlalak chu a bawm ațang chuan a phawrh ta. Mahse, kan tum leh kan beisei ang erawh a ni ta hauh lo mai. A thil uai ngóh te, a ek chhuak inhnawh țun te hmuh ka tum tehreng nen, thil var hlimthla paw rei ruai chauh a lo ni si. An thlalakna chu a dik lo anih loh paw'n Pi Sapchhungi chuan dawt a sawi nasa hle turah chuan kan ngai ta hmiah a.

Usangliana X-ray thlalak chu Doctor kan entir leh hnu chuan engmah thil țha lo a awm loh avangin a damdawi lo chawhte chu kan lei a. Kan inlei fel hnu chuan ke bawk chuan ka ni te In lam panin kan inkuah bâi phei leh ta sauh sauh a. Chutia muangchanga kan inchhawm bek bek lai chuan Party Office pengah chuan Pu Rualaua chu a rawn lang hlawl a, mahse min hmu ve lo thung. Pu Rualau chuan Silpaulin pahnih hi a rawn zakzeh țu țu mai a. Chutih pah chuan rem leh rem lo hian a kawrhma ipte chu a zen țawk țawk a, sahdah a rawn phawrha a hmuam ta a. Chutih lai tak chuan min rawn hmu ve a. A sahdah ah țhat leh pah chuan a Silpaulin zakzeh chu a pahnihin a pawm lawk a, chak zet chuan a let leh ta daih a.

Ka Usangliana pawh engmah țhat lohna a nei lo bawk nen, damdawite a ei chho ang a, a dam ve leh mai beisei chung chuan a tuk lama kan khaw lama haw tur chuan a inbuatsaih ta a. Keipawh ka ni te awmpui a, a țul țula pui tura rilru insiam chung chuan Aizawla la cham rih turin zanriah ei kham hnu lawk chuan thin thi satin ka muhil zui ta bawrh bawrh a.

Ka mumangah chuan Nuthlawi Roboihi a lo rai a, a fa chu Urosiama lo ni in !! Nl. Alawmi leh Haulawng nula, Nl. Thansangi te chuan ka Usangliana an lo inchuh a. Usawmtei nen chuan thla eng lawm e ti lo chuan a thim lai lai kan lo chuh dun rak rak a. Pu Rualau sahdah te kan lo ruk sak vel a.

                         ** THE END **