HRINGNUN TAWLAILIR

                 Ziaktu: Biaktea Hillu Ralte

          Amah Kawlbike-a (Kawlhnûna), kan Mizo fiamthu thiam khan, "Miin thiam tak maia Pulpit tlanga thu an sawi hian a va sawi thiam em kan ti ve lo, Hringnun Tawlailir chu khalh ngil e, kan ti țhin," tiin a sawi a, a nih hmel viau mai. Hringnun hi Tawlailir ang mai a ni a, nawr kal a ngai a, chutah chuan kan mamawh leh mamawh loh thlengin kan phur țhin. Mitinin chu Tawlailir chu kan nawr țheuh.

           He kan Hringnun Tawlailir hi khalh ngil thiam a ngai hle reng a, he khawvela mi hlawhtling (Mi lâr ringawt ni lo) kan tihte hi he an Hringnun Tawlailir khalh thiam tak tak hi an lo ni țhin.

         Hringnun Tawlailir hi khalh ngil a pawimawh kan tih rualin kawngkawia khalh ngil pât ringawt chu a fuh ber hauh lo. Tlan liam chiah hmabak a ni mai a, thihna hial a thleng thei. Țhenkhat Hringnun Tawlailir khalh thiam inti tamtak te hi kawngkawiah kawi loin an lo tlanliam fo tawh țhin. A kawiah chuan kan khalh kawi ve mai tur a ni a, chutihrual erawhin khalh kawi țheuh țheuhah kawngkawi/kual la thiam riau an awm țhin. Kawngkawia kawi a pawimawh tluk zetin kawngkual lak thiam a pawimawh tih i hria ang u.

           Tin, he Hringnun Tawlailir kan nawrna kawngah hian kawng pêng țhuam tamtak a awm țhin. Țhenkhat chuan a hnai hmel ringawt te, a nuam hmel ringawt te, kawng ngil țha nia an hriat lam ringawt te-ah an Tawlailir an nawr mai țhin. Mahse, he Hringnun Tawlailir kan nawr rual hian kan kal tumna hi kan chiang hle tur a ni. Kan tum hmun chu a hla emaw a hnai emaw, kawng a chhia emaw chhe lo emaw, kan duhna leh kal tumna kawngah ngei chuan chu Tawlailir chu kan nawr mai tur a ni. A nih loh chuan kan duhthusam leh kan tum ram kan thleng thei hauh lo ang.

           He Hringnun Tawlailir kan nawrna kawngah hian kawi leh pêng a awm ang chiahin kawng chhuk pawh a awm țhin. Hetih hun hi hahdamna'n leh tha khekna'n hman thiam a țul hle ang. I Hringnun Tawlailirah khan han pakai thauh mai la, hahdam takin kawng a chhuk chhung chu i chuang thei ang. Mahse, he hun tak hi fimkhur țul hunlai tak a ni tih theihnghilh suh. A steering veng uluk la, zuanthlak mai inpeih atin awm ang che. He hmun hi mi tam ber chetsualna leh thihna, an thih loh vek pawha ramtuileiloa an awm phahna hmun ngei chu a ni.

             Chutiangin kawng phei leh zâl nuam taka kan tawlailir nawr hun pawh a awm țhin. Țhenkhat he hmunah hian chawlin an khawtlai phah fo. A țhente phei chu an chawl hlen hial. Țhenkhatin kawng zâl leh ngil anih ngawt ngaihtuahin chak tak takin an tawlailir an nawr a, kawng ngil leh zâlah pawh khuar a awm ve țhin tih mangnghilhin khuar leh biboh an dai chawk. Tha hmang thiam leh fimkhur tak, muangchang lo leh chak lua si lo, kawng en ngun tak siin kan Hringnun Tawlailir chu kan khalh țhin tur a ni.

             Mi tamtak kawng pheia an chawlh hlen chhan leh an beidawnna hmun kawng chho mawlh mai hi ! Kawng a chhoh mai bakah khuar leh biboh lai a lo awm ve țhin si, he hmun innawr chhuak zo loa back leh, back liam leh si an awm nawk ania..

             Kawng kawi thiam taka i lo kualna te, i kawng tur ngeia i Tawlailir i nawna te, kawng chhuk țangkai taka i hmanthiamna leh kawng pheia thiam tak leh fimkhur taka i Tawlailir i nawrnate khan he hmunah hian pui chein kawng chho nawr kai tura chakna tur pawh i nei ngei ang. He hmunah hi chuan chak tut tut emaw, hmanhmawh vut vut lam a ni lo a, mi chak ber ber nih pawh a pawimawh ber lo. A pawimawh ber leh a tawp tlang chhip thawveng chuankai theihna chu a tira i hringnun tawlailir i lo nawr tawh dan leh a tawp thlenga nawr peih hi a ni tawp mai. I chak emaw chak lo emaw, i muang bik emaw i hnuhnung bik emaw, a tawp i nawr thlen tluka hlu leh pawimawh a awm lo. Chutih hunah chuan tlang chhip thawveng, Chawlhna In chu i thleng tawh ang.

            Tin, he Hringnun Tawlailir hian amah tichak turin khawl hran a nei ve lo a, petrol/diesel a mamawh ve hek lo. A nawrtu kutah a engkim a awm tawp a, a nawrtu nawr thiam leh thiam lohah a innghat a, a nawrtu'n a nawr peih chhung chu khawl chhia leh a tui kangin a tibuai ve hauh lo.