KEIMAH ROVUNGA - 3

               Ziaktu: Biaktea Hillu Ralte

                    BUNG 3-NA

             HAULAWNG TLEITIRI

Aizawl zin tumin Haulawng kan thleng hlawl mai tur chu ngaihtuahna mumal put a harin rilru a vak thui viau a. Chutihrual erawhin ngaihtuah a tawi tawk a, rilru mumal sen a har hle thung. Mitthla-ah ka pain hlauthawng leh beiseina sang tak chung sia ka kal tur min thlir liam doh doh lai te chu a rawn lang zut zut a. Aizawl lamah ka ni lah, ka thlen hun nghakhlel em em in mawng vawm ba chu nepte, englo hleh sak hmabak ang hrim khan a lo phi sek tawh ang a. A ring a lo fan uak uak dawn si. Engtin chuan ni zel dawn i maw.

Ka pawisa neih chhun lah chuanmanah ka lo pe zo tawh si a, motor remchang hmuin han let ngawt dawn mah ila pawisa neih miau si loh chuan a ngaihna a vang viau mai. Vai motor beh maina tur remchang chu Bus tukverh ațang chuan ka melh pah reng a, a vang hmel viau bawk si. Hmu tehreng pawh ni ila ka chuan peih tak tak pawh chu ka ring lem hlei lo a. Urosiama chu rilru te te chuan ka haw hluah hluah tawh . "Rosiama, hnarkaw vang si, hmuihmul buk si." ti te chuan ka rilruin Urosiama chu ka cheksawlh vel a. Mahse, a hmuihmul kha a ziat fai vek tawh tih ka han hrechhuak leh a, "Hmuihmul buk lo leh si." te chu ka tițha leh vel a.

Engpawhnise, Haulawng chu ka thlen hrim hrim a ngai chu a ni ta phawt a. Han thleng ve rawih phawt ila, a bak chu hunin a la hril chawp ve mai ang a. Khaw hmuh zauna ni bawk dawn sia tirilru chung chuan ka țhuthmun chu ka rem țha leh ta sauh sauh a. Mahse, mihlim lemchan leh kher chu ka tum tawh lo nasa mai. Ka thlanga țhu tlangval chu thil awm dan leh ka chanchin țhenkhat chu dawt tlem phuahchawp chungin chu ka hrilh ta a, engkim hrilh chi a ni lo tlat, dawt tlem nena mawi hnai taka ka inchhuah loh chuan min hmusit viau thei. A ngawi vung vung a, mi a khawngaih ve deuh a ni ang, kan Inah i rawn lut ve phawt mai dawn nia mi tita a. Thaw a veng huai huai mai. Thui pawh kan tlan hma chuan Haulawng khawchhung chu kan lut ta reng mai a, tha a khur ru der der reng mai.

Pențawng luhai leh na deuh ngut ngut chung chuan Bus kawngkhar ațang chuan ka țum thla vei chhak a. Chutihrual chuan lei-a lo ding tlangval sek țeu țo, hmulphurh chhe zet mai chu a au țhawt a, Ar țe ri chuan a chhunzawm nghal zat bawk. Chu pa chuan a Bag vel a siam fel chhungin a Ar; arawta a dah chu leiah a lo dah mai hi a ni a. Keilah chuan hmu hek lo i, ka lo zuk țum chu ni in, a tal arh arh a, a kâk chuai raih raih a. A neitupa bula va kun hniam pah chuan, "Talh tur tho a ni lo'm ni, tikhan talh sa a ni mai lawm," tiin ka han nuihtlawn thlem pah deuh a. Ani chuan mi rawn chhoh melh run a, "Teuh lo. Ar sualhuai Aizawla ka lei a nih hi. I țum hlum manah a man zat pawisa min pek a ngai, a nih loh chuan insual a ni mai." a tita chheu chheu mai le!! A tir ațang phata hawtu leh hmelma ka'n nei nghal ngawt mai chu hrehawm ka tirilru hle mai a. Khaw țhenawm ang ngawt kha chuan Haulawng boruak hi chu a hit dawn lo ni hian ka hria a, ka zam ru viau mai.

Ka thlen In Tlangval tur, Ramhmangaiha M.A (Ama insawi dan deuh kher) chuan ngaihdam te mi'n dilpui hnu chuan chu tlangval sek țeu țo zet pawh chu tlemin a nem ve ta deuh a. Mahse, a thu vuakthluk erawh a ngaihnobei hran chuang lo hle. "Kan inhmuh leh hunah pawh ka thin a la rim reng dawn a nia aw." a ti mauh mai a, huphurhawm ru tak chu a ni. Mahse, Tv. Ramhmangaiha M.A chu a zah ru viau tih a hmel leh mitmeng ațang chuan a hriat theih.

Tv. Ramhmangaiha M.A hi lehkhate a zir san bakah M.A hial a nih avang chuan an khua-ah chuan tlangval zahkai ber a ni a. Rual u emaw, naupang deuh emaw, puitling thlengin an ngaisang vek. M.A a nih vang ngawta ngaisang an ni lo a. A ni hi chu M.A rau rau-ah pawh M.A Science a ni tlat. Chu chu ama insawi dan a ni. Tunah pawh hian Ph.D a bei leh mek a, a thesis chu, "Hmanlai Sangha tlâng vuak leh Hydrogen" tih a ni. A science thil ruih avang chuan a awm ang tur pawh keichuan ka suangtuah thiam lo. Khawtlang mipui tam zawk hi chuan V.C inthlan leh hunah chuan tuna VCP ni lai Pu Biakchhawna chu a hneh theih ngei an ring ru vek a. Mahse, tuma'n an sawichhuak lem lo.

Tv. Ramhmangaiha M.A nen chuan an In lam chu kan pan dun hnak hnak a. Khua chu 'THIMHMUL' an tih ang vel hi a ni tawh. Tv. Ramhmangaiha M.A chuan Sunglass vuah rah chung chuan a hawi larh larh reng a. Chutia sang veh vawha hawi chunga a kal ta chu, a hma-a lungtumah chuan a va inchhir dawt a, a pai uan uana a thal ta hlawl mai a. Mahse, M.A Science thluak fim a ni bawka rang mangkheng chuan a rawn inperhtho leh nghal a. Kawngsira naupang pahnihte chuan ngaihsan hmel zeta melh vawng vawng pah chuan a kungfu thiam zia chu an inhrilhru sap sap a.

Tv. Ramhmangaiha M.A te In chu kan thleng ta. An in pawh a lo nuam phian mai. Kawngka lu-a hming intar chu ka'n en a, C. NGAILOVA tih chu hawrawp nalh chi hian a lo inziak kalh a. Ka rilru te te chuan Chhakchhuak hnam an nih ngei hi, inti Chhakchhuak ve hmiah teh ang. Mikhual satliah rau rau-ah mahni hnampuite hi chu kan lo duat deuh nge nge a lawm tirilru neuh neuh chung chuan inchhung chu kan lut ta a. An chhungkua chu an tam lem lo khawp, a nu leh pa leh a farnu, a pi nen an ni mai. Kan luh rual chuan an lo ri deuh hlat a. Mahse, ka hmel an hmuh chuan an ngawi țhap a, kei leh Tv. Ramhmangaiha M.A chu min melh tawn ralh ralh hlawm a. Tv. Ramhmangaiha M.A chuan ka chanchinte a sawi hnu chuan thingpui kan in a, kan inbual peih hnu chuan zanriah kil zai kan rel ta a.

Chutia zanriah ka'n kil ta chu a inthlahrunawm ru ang reng hle mai. Tlangval ve lem, mahni zinna tur haia a ni lo lam daiha zin ta mai chu engtiangin nge min ngaih ang tih ka ngaihtuah pha lo. Tv. Ramhmangaiha M.A nau, nula dawn dawn tawh lah chu a chhe lo reuhin ka ngaihzawn chak zawng tak hi a ni roh lehnghal.

Intihtlangnel chawp tum chuan, "Hei, Chhakchhuak ve tho in lo ni awm a, keipawh hi Chhakchhuak tlangval ve ngat a sin ka nih." ka han ti a. Ka rilru te te chuan Ka Ralte Bengchhenna ka'n phatsan ta mai chu nuam lo hi ka ti khawp a. Mahse, tactic țha tak nia ka hriat avang chuan apply ngei ngei a țul si. Pu C. Ngailova chuan rum nghut pah chuan, "Chawngthu zawk kan nia." a tita nghut a, ka hrilhai ru ang rengin ka zak reuh khawp mai. Mahse, intihtlangnel ka tum ta sa sa, zak lo der chung chung chuan Chhakchhuak leh Chawngthu kan in unau zia chu ka phuahchawp ta a. Chhinlung Puk chhungah phei kha chuan pawnpui pawh inpawh țawm hial kan ni a. Chhakchhuak leh Chawngthu te chu Chhakchhuaka leh Chawngthuate unau fate/thlahte kan ni a, an pa chu Pu Fanaia a ni e, te ka'n tih hnu chuan min melh vung vung a, a awih lo hmel hle lehnghal.

Thlen In nu chuan chaw ka duh leh duh loh mi rawn zawt a. Kei, intițawngkamthiam laklawh chuan, "Khawimaw, Ektum tiah lek te khan." ka'n ti kher a, kan Nula-i chuan a fian dah rik rawk pah chuan a thleng chu a chawi lawk a, a kham ta nal nal a. A zia lo ka ti ru ang reng khawp mai.

Zanah chuan Tv. Ramhmangaiha M.A țhianteho chu an rawn lut khawm țak țak hlawm a, mahni tawkah an inla sang ve larh larh hlawm hmel viau. Tv. Ramhmangaiha M.A a lo haw tih hriaiin țhenawm hnai Paho an rawn lenglut bawk a. Kei, hmel hriat loh min hmu ta chu ka chanchin leh eng mi nge ka nih tihte chu min zawt nak nak hlawm a. Ka nihna ang diak diaka ka sawi vek chuan min hmuhniam hlawm dawn riau hian ka hre ta a. Engtin tin emaw chuan Sipai chhuți, Aizawl zin khawthawn tum, tihpalh thilthua an khua thleng ta ang chuan mawi nalh fahran chuan ka inchhuah ta a, min en dan a dang ta deuhin thlen In pa pawh a mi thlek dan a dang ta deuh.

Pu C. Ngailova ho chuan Chanchinthar chu kan en țhap a. Chanchintharah chuan ISIS hoin mi an thah leh tak thute chu an rawn puang a. Paho chu an chek tlak tlak hlawm a. Tapkila țhu Pu Darzapa chuan a meizial meilinga nawr nawk nawk pah chuan, "A rapthlak țhin teh e. ISIS an tih ho hi an rapthlak em mai, German ral lian te kha an ni thei leh mai lo maw!?" a rawn ti sap a. Tlangvalho chuan chil kan lo lem khalh hlawm a.

Pu Thanhlira chuan, "Sawi takah chuan nang M.A Science val i awm bawk a, tunlaia ISIS an tih fo mai te, Taliban an ti emaw ni te, terrorist an tihte hi eng e maw an nih chiah le?" tiin Tv. Ramhmangaiha M.A chu a'n zawt a. Tv. Ramhmangaiha M.A chuan, "Heng, Taliban, Al-Qaeda an tih ho leh a dangte hi Terrorist an ni a. Tunlaia ISIS an tih hi chu an danglam hret a, Terrorism an ni thung a." tiin a han hrilhfiah hlawm a. "Tin, Mizoram ang a hetiang pawl indin hi chu 'Hel' an ni a. India ramchhung hmundang a mi ho hi chu 'Firfiak' an ni thung." a han tih leh hnu phei chuan kan vai buk nghut nghut hlawm a. Thil a hria kan ti hlawm hle.

Keipawh chuan insawitheihna hun remchang chuhin Kashmir thlaler hmuna kan awm laia terrorist ho kan beih nasat zia te, terrorism phei chu beih an har zia thute chu ka'n sawi ve a. Chil lem khalh khalh pah chuan ngaisang hmel zet chuan min thlek he haw hlawm a. Ka malpui pân ser lianpui mai chu ka hlim lang a, hengte hi LMG puakrang silaia min tlirna a nih hi ka'n ti vel a. "Kan hma-ah tak te hian Bomb hi a rawn puak leh thawr mai țhin a, hmai hi a sa vut a, mithmul leh hmuihmulte hi a kang hmui chum chum mai țhin a, kan innuih leh ringawt țhin. Țumkhat phei chu ka bul maiah hian bomb a rawn tla a. A puah hma chuan a fuse chu seh phawi ka tum a. Ka seh lai tak mai chuan a puak ta si, hnarhmul leh hnapkhir a leng chuai mai a sin" ka tih lai te chuan Tv. Ramhmangaiha M.A pi ho chuan min lo thlek dauh dauh hlawm a. Pu C. Ngailova erawhin a awih ta chiah lo a ni ang, lehlam hawi pah chuan a 'Ê' bai bai a. Hetiang huna mar leh mawi tak maia dawt phuahchawp ka'n sawi thei mai țhin hi keipawh hian mak ka inti ru fu țhin. Ka eizawnna tura khuanu duan pawh a ni hial zawk maithei e.

Paho an haw hnu chuan Tv. Ramhmangaiha M.A țhiante chuan naktuka football tournament an khelh tur chungchang chu an sawi nak nak hlawm a. Chutia an defender țha ber Tv. Ramhmangaiha M.A a rawn haw hlauh mai chu an lawm rual rualin an goal veng ber Tv. Fakawma zin daih mai chu a buaithlak thu an sawi sap sap hlawm bawk. Tv. Duhzuala chuan mi melh vung vung pah chuan goal ka ven thiam leh thiam loh chu mi zawt ta reuh a. Keilah lo duai lo nasa, goal ven te chu ka tette ațanga ka hnehsawh ber mai anih zia chu ka sawi ta a. Goal ngei ngeia tura ngaih tawh pawh vawitam ka lo chumchhuah tawh thu te, sipai team-ah pawh goal veng pha ngat ka nih thu chu ka phuahchawp leh ta a. Duhai chuan ka insawithei mah mah em aw ka ti deuh. An zavai mai chuan a tuka an team goal veng tur chuan min ti ta, ka lawm rual rualin eng ka ni dawn lo tih ka inhre reng mai si. Ka khawngaih ru hlawm khawp mai.

Zan a rei lam a ni tawh bawk a, tlangvalho pawh chu an haw ta a. A tuka țha taka khel țheuh tur chuan kan inthlah ta hlawm a. Keini pawh mu tur chuan kan intintuah țan ta a. Kan Tleirawl duhawmi, Tv. Ramhmangaiha M.A nau chuan ka mutna tur chu mi siamsak a, a siam zawh chuan mi nuih seih pah hian, "A mut theih tawh aw, tui deuhin i mu dawn nia." a ti hnap reuh a. Ani pawh hian Sipai chhuți lai ka ni tih a hriat a țang khan a mi melh dan a dang tlat. A țawng paha a nuih seih dan leh a mi melh dan ațang khan beisei nei deuh tlat hian ka hre pek a. Zanin chu ka zen chhin dawn em maw ni te ka ti rilru rum rum mai.

Chau ru viau mah ila muthilh mai chu har ka ti khawp mai a. Engtia awm zel tur nge ni ang ti chuan ka rilru chu a buai ve khawp. Chutihlai chuan Pu C. Ngailovate nupa pawh chu khumah chuan an țawng sar sar reng a. An room sir maia mu ka nih avang chuan an țawng ri pawh ka hre reng. Pu C. Ngailova chuan, "A mawl pawh a mawl reng reng, Aizawl kal tum hetilama rawn chuan phei ringawt. A thilsawi te pawh kha ka ring nek lo e. Naktuk chu football chu han khel ve phawt se, tukleh ațang chuan feh pui char char tur." a ti sar sar a. Ka ngei ru ang reng khawp a. Mahse, a sawi dik viau lawi bawk si. Nakin deuhah chuan an reh ta hmak a, a ri deuh set set a, Pu C. Ngailova chu a rawn si ta hlarh hlarh a. Chutia mi awhsik/awhfik awm taka Pu C. Ngailova si hlarh hlarh chuan ka thin a tihrim rualin ngaihtuahna a hruai thui ta viau mai. "Mi fehpui te i tum vel maw, i fanu sawn min beisei khawp. Ka zen dawn chiang a lawm. Nangchauh i si bik dawn lo" ti rilru chung chuan ka tho ta țham țham a.

Tv. Ramhmangaiha M.A pawh a room chhungah chuan a hnar a tum hlarh hlarh tawh a, a pi lah a beng a ngawng bawk. Pu C. Ngailovate nupa lah an si tui nasa mai si a, hlauhthawnawm vak awm chuan ka hre lem lo. Kan Tleirawl duhawmi luhna room ni ngeia ka hriat chu ka pan țham țham a. Nuthlawi Roboihi te ai thlawt chuan kan tleirawl duhawmi zawng, a sa a la muk țhain a tharlam dawn a ni tih ngaihtuah chung chuan room kawngkhar chu ka thleng ta reng mai. Tha a khur ru der der a, chilthli a far țan titih der mai.

Room kawngkhar chu ka'n nam det a, a inhawng ta hiau reuh a. Room kawngkhar pawh kalh loa a lo dah danah min lo beisei lawk a ni ngei ang le. Room chhungah chuan ka lut țham țham a, khum lam chu ka pan ta nghal a. A lo inkhuh deuh hlan a, tlemin a lo saisir deuh bawk a. Engtia han tihtur nge tih chu ka buai ru khawp a. Han bawh thut mai tur nge, zawi muanga chet zawk tur ni ang. Ka bawh thut chuan a țe palh ang tih hlau chuan zawi muanga hmalak chu a țhat ka ring ta zawk.

Rizai chhungah chuan muangchangin ka kut chu ka zen lut a, a mal bawr vel chu ka va khawih da da a, a lo phu deuh aih aih a. Hmm..a phut deuh ai ai danah a muhil lo tawp mai, min lo nghak reng anih hi ti rilru chung chuan a rizai chu ka hlim thla ta dek dek a.

Ngaihtuahnain hnuailam a pan ngut ngut tawh a, hnuailam lahin a lo tur let nasa tawh mai bawk si. Thinlung hi a su dup dup thei nia. A tuipui chhuah tir ngei tum tak mai chuan rizai chu ka hlim thla zel a. Mahse, beisei ang a ni ta lo. Ka lo insanmar nasat tawh vei nen, khuma mu chu kan tleirawl duhawmi awzawng a lo ni lo. Tv . Ramhmangaiha M.A pi lek chu lo niin. Veilam hawi deuh titih chung chuan a lo mu ang bai a, a chilthli chu a kamsirah a lo phuan deuh chap bawk. Beisei loh deuh hmu ta chu hnuailam pawn rawn tur zai reng a rel ta lo. Ka lawm lo ru ang reng khawp a. Suangtuahna ka hmang nasain ka veh uluk ve tehreng nen le. Hlawhchham man hrim hrimah, engmah dek loa mut leh tlawng aiah ti rilru chung chuan Tv. Ramhmangaiha M.A pi hnute vuai tawh tak mai chu thinrim ru țun chung chuan ka zuk țham sak kher a. Ani chu a rawn che hrut a, tep chuap chuap chung chuan a hnarkua chu a rawn vang hek hek a, a hahchhiau ta tlar tlar a.

La tho peih lo viau mah ila khua a var tawh a, mikhual ni bawk si nen inthlahrunawm deuh nia ka hriat avang chuan ka tho ta a. Kan Tleirawl duhawmi pawh chu a lo tho tawh a, thingpui min lo pek pah chuan i mutui em tih leh nuih seih paha mi melh ralh chu a rual a. A kawng bawr leh mawng bawr, a kal zawnga a'n ințhial vel chu melh vawng vawng pah chuan nizan khan i pi kha nangmah ni la aw ka ti rilru vawng vawng a.

Thingpui in zawh chuan pawnah ka han chhuak a. Tv . Ramhmangaiha M.A nu chuan ar chaw a lo pe mek a. Archaw theh pah chuan "Chîri chîri" tiin a au lauh lauh reng a. Chutihlai chuan an vawk note lak thar pawh chuan chaw a lo ngen ve ruai bawk a. Pi Ramthliri (Tv. Ramhmangaiha M.A nu) chuan an vawkte chu chaw suah pah chuan tihtlangnel tumin "Rîte rîte" tiin a hiat heuh heuh bawk a. Ar chaw pe bawk, vawkte chaw pek pah leh koh pah bawk si chuan a sawisual ta. "Chîri, Rîte" tih tum chuan ring tak mai hian, "Rîchite Rîchite" a ti ta lauh lauh a.

Chaw ei pawh a hun leh dawn tawh a, kan vai chuan kan țhu țhap hlawm a. Tv. Ramhmangaiha M.A pi chu a hlim sarh reng mai a. Kan tleirawl duhawmi hnenah chuan, "Nizan chu ka mumangah i pu nen kan lo leng dun a. Awi..ka sawi tawh lo mai ang." tih pah chuan a nui vei har har a. Engtak a mumangah hmu nimaw. Ka lo va zut vel avang khan mangpui a mang a ni chiang mai ka ti rilru nuap nuap a. Chaw te kan ei kham hnu chuan Tv. Ramhmangaiha M.A țhianteho pawh an rawn lut țak țak a. Inkhel tur chuan field lam pan chuan kan inzui chhuak ta țham țham hlawm a.

Field kawngah chuan tlangval sek țeu țo, hmulphurh chhe zet, a Ar ka țum hlum sak nen chuan kan intawk ta hlauh mai a. Mahse, ka bula kalte chu khawkhat tlangval zah kai hlir an nih avang chuan engtinmah min ti ngam bik lo. A kutzunglai mi hmuh zauh pah chuan, "Ai bi bêk" a'n ti sap a, ka hlau ru ang reng hle mai. Mahse, ani pawh hian Sipai chhuți lai ka ni tih chu hria se min tihngam bik ka ring chiah lo. Field kan thlen chuan khel hmasa turho chu an lo khel mek tawh a. Hemi dawtah hian kan khel ve dawn a ni.

Kan khelh hun chu a thleng ve ta. Field chhungah chuan kan han in-warmup vel a. Keichu a laiah min din tir a, ball chu an rawn sût pawp pawp hlawm a. Keilahin ka lo chum sawt awl awl zel a, an hlim tlangin ka lakah beiseina an nei sang hmel hlawm hle. Inkhel kan țan ta; lehlam team chuan kan team chu a mihring mihrinna zawng tak pawha an hlauh leh zah vek an nih avang chuan min hneh lo angreng hle a. Mahse, goal erawh kan team hmatawng Tv. Hausiama leh Tv. Ramthara te chuan an thun thei mai bik lo.

Minute 10 vel dawn chu kan khel ta reng mai. Mual lai ațang chuan lehlam Laitlan Tv. Hunliana chuan ball a rawn hlawi phei a, an hmatawng chuan a rawn um phei bawk. Mahse, kan lamah chuan defender hnungdawl Tv. Ramhmangaiha M.A a awm tlat. Tv. Ramhmangaiha M.A chuan ball chu ka lamah a rawn chhip(head) phei ta zeuh a, mak ka ti rilru hle. Tv. Ramhmangaiha M.A chuan engvanga kan lama goal thun tum mai nge anih chu ka hrethiam lo hle a. Lo man sak daih ta ila, a thinrim ka hlau bawk si. Mak ti ru tak chung chuan ball chu ka en goal ta ngawt a, lehlam team leh a țantute chu an au hluah hluah a.

Tv. Ramhmangaiha M.A chuan mi rawn pan a, thinrim hmel tak chung chuan, "Ngatinge i man loh?" mi han ti vin țhak a. Kei chuan amah en he haw pah chuan, "Eh ! Man loh tur em ni? " ka lo tilet hu a, a bei a dawng hmel viau mai.

An beisei ka phak tak loh em avang chuan an second goal vengtu Tv. Dinmawia chuan min rawn thlak ta nghal a, ka zak ru viau mai. Field sira țhute chuan min lo en țhap a. Mahse, zak lo hmel fahran chuan Sipaia kan khelh dan nen a inan loh zia te, Sipaia kan khelh dan chu dan dik a ni a, FIFA paw'n an rawn entawn ber anih ziate ka sawi hnu chuan min ngaisang leh hmel hlawm viau a. An rilru te te chuan Tv. Ramhmangaiha M.A thiamlohah an ngai ru ta vek a. Mahse, an tilang ngam hlei lo a.

Kan piaha ngaisang hmel taka min lo thlir rengtu, field hungna pal nghenga lo ding bawih hnap mai nula, Nl. Thansangi chuan ka mit a la ta viau mai. Thlen In nula Tleirawl duhawmi kha chu duhawm teh mah se a u Tv. Ramhmangaiha M A hi ka ngam dawn lo tih ka chiang a. Tunah lah ka lakah a lawm lo dawn ropui si. Chu ai chuan duhthusam mek mitmenga min melhtu Nl. Thansangi chu bawhzui a, chhuah hauh loh chu ka tum ru ta tlat a.

Tv. Ramhmangaiha M.A țhiante chuan min haw hlawm viau mah se tihlan reng bik thu awm suh, Nl. Thansangi chu min rimpui ta hlawm a. Zankhatna mai ațang pawh chuan a hawiher a dik nghal em avang chuan lenpui pawh ngai ka inti ta lo. Keimah chuan ka leng ve ta a. Sipai chhuți te ka ni bawk nen, a nu ho chuan min lo be țha hlawm hle mai a. Tapchhakah țhuin kan titi lai lai a. Nl. Thansangi nu chuan, "Tunah khawi hmun nge i post ni reng reng, a ralmuang em?" tiin min zawt a. Kei chuan ka awmna hmun chu Afghan vur ram, India ramah chuan hmun hlauhawm ber mai anih thu chu ka phuahchawp leh ta pek a. Nl. Thansangi nu chuan chek tlak tlak pah chuan tunhma deuha Afghan snow powder lar țhin zia te chu a sawi a. Keichuan Afghan vur, kan awmna vel ami hmanga an siam anih thu ka hrilh leh hnu chuan naupangho chu a mutpui ta a. Nl. Thansangi paw'n a mi ngaihsanna hmel a la dahțha thei bik lo.

Chutia kan pahnih chauha țhu dun ta chu kan lai dun vei deuh țat țat a. Chhuanlamah keichuan nimina field-a ka tengtere den lei, ka ei bang chu ka phawrh a, "Ei ve mai mai ta che" tia pek pah chuan a kut chu ka hiat ru zauh a. Nl. Thansangi lah nula zeihawi tihtakah lo lak pah chuan, "Awi Uvung i zei em mai, kan insum zo dawn hleinem. Keini ang kut te i hiat ve duh a." tih pah chuan a mengno nghal hnalh a. A bawp kual tak te chu ka thlek vawng vawng a, lawițhat zana min kual bet tlat atan ka awtin ka iai hauh lo. Mahse, a boruakin a zir ta riau bawk a, han inkual tir nghal mai chu ka tum ta a. Mahse, kutin a hna a țan dawn chauh tih chuan a pa leng chu a rawn haw ta hlawl a. Tv chu a on a, R.Lalbiaksanga zai ngaihthlak pah chuan țhutthlengah chuan a mu ta then a. Len rengna chi anih tak loh avang chuan haw zai ka rel ta a. Nl. Thansangi chuan kawt thleng min rawn thlah a. Ka kal dawn chuan, "Uvung, mipa insiam hi a țha ka ti. Nangmah insiam zawk rawh aw." a ti vei țut roh a.

Chutiang chuan ni li lai mai chu ka cham leh ta reng mai a. Nl. Thansangi nen kan boruak pawh a fuh zel a, Tleirawl duhawmi pawn ka lakah a seih mawi a la thlah bang bik lo. Awllen hun te a ni chho ta nen YMA pawh chuan Kût phuahchawp, 'LENG DÊR DÊR KÛT' hman chu an rel tlu ta a. Chhunlamah intihhlimna hrang hrang hman ani a. Zanlamah erawh mitin nghahhleh programme ropui duan a ni. YMA Hall-ah kalkhawm tur a ni a, zaithiam hrang hrang te leh fiamthuthiamte an che dawn a, mitin mai chu an phur hlawm hle. Keipawh hma taka chhuakin Nl. Thansangi chu ka va sawm a, LENG DÊR DÊR KÛT night hmang tur chuan kan inzui chhuak ve ta.

Kan thlen ve meuh chuan an lo tam tawh hle a. Țhutna mumal pawh chang tawh lo chuan a hnunglamah chuan kan ding țhup a, țhutna chang lo kan tam phian mai. Programme țan nan an khaw Rock Band lar ber, 'ROCK NGAWR NGAWR BAND' te chuan Lalroutmawii hla, 'A laiah Isua' tih chu an rawn sa a, an rock nasa bawka boruak a țhap țha ngei mai. Chutiang chuan boruak zangkhai leh hot tak chu kan hmang chho ta a. Hall hnunglam, kan dinna bawr chu kan sahawk nasain kan lam mup mup mai a. Nl. Thansangi pawh a lam fet thiamin a bawp kual tak chu a hmangthiam phian mai a, lungphu a rang țan riau.

Kan bul maiah chuan Tleirawl duhawmi leh a țhiante pawh chu an rawn mawngsuk ve zak zak bawk a. A mawng keh kawng bawr vel a'n suk paha a han inchheknghawlh vel chu hmuhnawm tak a ni. Khaw țhenawma ka mihlim lemchan laia Nuthlawi Roboihi leh mihlim nuho ka lama an mawng an rawn poh tarh tarh hlawm ai kha chuan tleirawl duhawmi mawng bawr leh Nl. Thansangi bawp kualte chu zia haih haih tak a ni.

Chutia a sexy thei ang bera kan lam hup hup lai chuan current a rawn thim ta. Ka rilru chuan tun hi chet lak hun diktak a ni ti chung chuan Nl. Thansangi chu ka kai lawk a, pawnlamah chuan ka chhuahpui ta. Kawngka kan thleng chiah tihin current pawh a rawn awm ve leh nghal a. Mahse, ka tum ta sa sa, hall thlang hmun rualrem leh thimlam chu ka panpui ta dat dat a. Ani pawh chuan mi zui ve zel bawk a.

A him chin nia ka hriat kan thlen hnu chuan engkhaw sawi set set lo chuan ka kuah bet nghal chawt a, ka hmui chu a hmuiah chuan ka nawr bei nghal chat bawk. Mahse, ka eu awrh a, leiah chuan ka thal nghal dawt a. Thimtham hnuaia Nl. Thansangi emaw tia ka kaihchhuah kha Nl. Thansangi awzawng a lo ni lo. Tv. Darliana, sek țeu țo, a Ar ka țum hlum sak zawk kha a ni. A thin a rim nasa mai a. "Ka țum hlum ve dawn chiang khawp che," tih leh mi țum chu a rual ta nghal. Ka theihtawp chuan ka lo indang ve a. Ani lah chuan a duhtawk har phian leh ta nghal. Nakinah chuan a țhiante chuan min rawn hmu ta hlauh a, an pawtsan thei ta hram a. Hall chhunga lut leh chi rual ka ni ta lo, țhen tlawk tlawk chung chuan ka haw ta hnang hnang a.

Zingah chuan bui deuh luk chung chuan ka tho chhuak ve a. Min lo en țhapa zawhna erawh min zawt hlawm hran lo a. Dan ngaitein Tleirawl duhawmi chuan thingpui mi rawn pe leh var a, thingpui in pah chuan zingkar chanchinthar chu kan en țhap a. Chanchinthar tawplamah chuan mibo an rawn puang ta. "Tv. Rovunga.......chumi khua....Aizawl kal tur....a chin hriat a ni lo.... Track kekawr Bawkbawn bai rawng ha...." Chutia ka inthuamna nen lam ka bo thu an rawn puang ta mai chu ka hril a hai ang reng hle mai. Ka bo tawp si lo a le. Ka chhungte chu an va mangang dawn tehreng em! Mibo puanna-a min rawn puan tir ve pawh chu an tan chuan a awm hliah hliah mai.

Tihngaihna dang awm hek lo le, a remchan dan ang ang a kan khua ka pan leh phawt chu a țul chu a ni si a. Thlen Inte hna ka thawh sakna hlawh ve lah Nl. Thansangi lawmzawng, chithlum leh tengtere den lei nan ka hmang zo vek tawh si. A dang dil leh ngam ni tawh si lo, rilru a buai ru map map hle mai. Vanneihthlak deuhin khawchhaklam unaute Bawng kai ka hmu fuh hlauh mai a. Bawng kaihpui paha inhlawh pah theih anih bakah kan khawlam road-a kai tur an ni bawk a. Thenzawl thleng kaihpui phei chuan pawisa an inhuan sang viau lehnghal. Thlan tur dang awm chuang hek lo, Bawngkai chuan ka chhuak ta a. Nl. Thansangi mangțha lo leh engmah pawh hrilh hman loa ka kal mai tur chu nuam lo ka ti ru khawp a. A bawp kual lah ka inkual tir ta bawk si lo. Tleirawl duhawmi pawh chuan an tukverh ațang chuan mi rawn thlir liam dauh dauh a.

Uluaia, ka Bawng kaihpui pa chu ka hlawh tur chu ka dil lawk a. A rem ti lo viau nain meizial lei te ka duh ve si avang chuan ka dil lui tlat a. Mi a khawngaih ve deuh bawk nen min pe ta hram a, min hlawh tam tir dawn phian lehnghal. Thui pawh kan la kal hma chuan a Bawngte chuan kawngthlanga luangno chu an hmu fuh ta, peh tum chuan kawngthlang chu an pan chhar chhar hlawm a. Uluaia chu a buai kher mai. A tianga Bawng vuak leh nem pah chuan, "Hey nangkha, khilamah suk lawh, suk lawh" tih pah chuan chhaklamah chuan a rawn um chho țhin, Bawngho lah thlanglamah bawk an chhuk leh țhin si. A buaiin a thin a rim ngang a ni ang, mi rawn au tuar tuar a, "Lovung, Bawng hi sak lamah lo nawl suk ve teh." a rawn ti ta, ka nuih a za hle maia mahse, ka khawngaih ve deuh bawk si.

Chutia Uluaia Bawng nawra a buai zak zak lai chuan Sumo thawl tak hi a rawn tlan hlauh mai le. Pawisa ka nei tawh bawka ka lo phar ding ta a. Bawngkaia kal ai chuan Sumo-a chuan chu a thlanawm em atin ni. Uluaia pawh chu ka khawngaihin ka zah ru viau mai. Uluaia pawh chuan Sumo-a ka chuang chu min rawn hmu ta a, a hrilhaiin a thinrim hmel hle mai. "Het Lovung, lo suk so ngal lawh. Lawh pawh ka pek che kha." tiin a rawn au tuar tuar a, a mittuite chu a tla pur tawh hian ka hria.

Che khawloin che fuh lo viau țhin mah ila engtin tin emaw hian vanneih rukna riau hi ka nei leh zel pek țhin a, ka lawm țhin viau mai. Hahdamte chuan kan khaw ram chin pawh chu kan thleng leh ta mai reng a. A hma-a ka motor lo channa hmunah ngei chuan ka chhuk ta a, khawlam pan chuan kein ka paidal leh ta hnak hnak a .

Khua ka luh meuh chuan ni a tla fel tawh a, khua erawh a la eng fu thung. Khawchhung chu a reh deuh ruih hian ka hria a, min zawng hian an chhuak bo vek pawh a ni zawk maithei. Nl. Alawmi te kawt ka thlen chuan Nl. Alawmi chuan puanpho a lo seng mek a. Chutia mi'n hmu thut chu mak a ti hmel hle. Hmui hup chung chuan mi rawn pan a, "Awi !! Ka va'n lawm tak, i bo daih sia keiphei chuan i dam pawh ka ring tawh lo." tih pah chuan min chibai hnap a, mi rawn chhoh melh zauh bawk. Chutia kan khaw nula fel leh ka zah ber maiin min han ti ta chu ka lai chhe viau pek mai a. Ka rilru te te chuan puanhlap pawhsawihpui atan ka lo it hman leh pek khawp. Nl. Thansangi leh Tleirawl duhawmi te zawng, mual kar a hla leh ta em mai tiin Haulawng Tleitirite pahnih chu ka thinlung ațang chuan ka delete leh ta hmak a.

Dawrkai Uthanveli dawr ka thlen chuan dawr ațang chuan Pu Rualaua chu a rawn chhuak chiah a. A tuibur hmuam pik puat pah chuan, "E heu ! Rovunga chu, i bo leh lo a ni maw? I thi tawh hialah kan lo ruat che a sin." tih pah chuan min han chibai lawp lawp a. Kan inchibai zawh chuan a ipte chu a zen rak raka sahdah a rawn phawrh a, a hmuam ta a. Ka zin dawn lai khan tuibur hmuam pung chung khan sahdah nghei a tum tawh thute kha a sawi si a. Tunah lem, tuibur a hmuam a, sahdah a la hmuam tho bawk si! A ngaihna ka hre lo viau mai.

Khatia Pu Rualaua'n sahdah nghei tuma a thlakna'na tuibur a hmuam ta kha sahdah nghei tak tak thei si lo, tuibur ti laklawh leh tawh siin a pahnih chuan a lo hmuam phah ta ngawt hi a ni awm a. A zia lo hle mai. Upa Sawma paw'n a sermon na-ah Pu Rualaua chu tehkhinna'na hmangin thil țha lo paihthlakna atan leh invenna'na a țha lo dang bawk hman leh pawi zia a lo sawi hrep hi a ni awm a.

"Hei, Pu Rualaua pawh a sahdah hmuam țhin țha lo a tih em avangin a sim theihna'n Tuibur a hmuam ngawt a. Tunah chuan an pahniha bawihah a tan tak hi. Chutiangin kan ram paw'n ram sum dinhmun țha lo chawikanna'n leh, țhalaite hmakhua thlir inti in, kan lo țhat tlanna tur zawk leh kan dinchhuahna'n tiin zu a zuar ta rup mai a. Ngaihtuah teh u unaute u, thil țha lo chu thil țha bakin a siamțhat theih loh laiin thil țha lo chu thil țha lo bawkin kan vur hnan a, a irh chhuah tur nen phei chuan thil țha lo thuah thum kan ramah hian a inthuah ta. Chu chu thim thuah hnih chu a ni." tiin a mimal ngaihdan nen țangkawpin a lo sermon piap piap hi a ni awm a. Ruling Party leh amah Pu Rualaua chuan an haw hle mai chu niin, chumi țum ațang chuan Pu Rualaua paw'n Ruling Party-ah a hming a ziak lut ta a lo ni.

Kan kawmthlang ațang chuan kan In chu ka'n thlir chho a. Țhenrualțhate leh chhungte, țhenawm hnaivai ho chu an lo awm țhap a. YMA hruaitute pawh an lo vir vat vat bawk. Tukverh ațang chuan min rawn hmu ta hlawm a, pawnah chuan an rawn tlanchhuak phak phak hlawm a. Ka Pa pawh a tiang rinchhan chung chuan a lo ding khur hlak hlak a. A fapa sun tawh mai tura a lo inngaih laia chutia ka lang leh hlawl mai chu a lawm rual rualin eng emaw tak chu a rilru-ah a awm tih chu a mitmeng leh hmelah a chiang reng mai.

Ka chhungte leh ka pa ngei pawh hian fapa tlanbo ang khan ka irah an hmui chuktuahin Sebawngno min talh sak dawn lo tih ka chiang bawk a. Engkim tawrh inhuam leh huphurh ru tak, insawi fel hram dan tur ngaihtuah chung chuan kan In pêngah chuan ka pheichheh chu ka rem chho ta bauh bauh a.