RIANGHLEI LAITHIN

                       Biaktea Hillu Ralte


Natna khumah mu hleithei loa ka țhut reng lai hian,
Ka ngaihtuah țhin ngaihtuah loh tur-
Hlimna phena lungngaihna biru reng leh,
Lungngaihna hnunga hlimna kawl rawn eng țhin te,
Beiseibo beisei tlatna te leh,
Duhthusam lêng vâk satliah beiseina te hian;
Beiseina a tibeidawngin,
Beidawnna ruamah beiseina min pe lawi si.


Hmangaihna te hian hnutiang min chhawn a,
Duhsakna leh khawngaihna te chuan anchhia min lawh si țhin.
Chu anchhia avanga hmangaihna ka dawn nasatzia ka ngaihtuah hian,
Hnutiang chhawn hnu ka nih avanga duhsakna leh khawngaihna ka chan zozai hi ka mangnghilh fo thin.


Ka siamchawp hlimnate hian min ti lungngai a,
Lungngaihna ruamah erawh hlimna ka siamchawp fo lawi si!
Hlauhthawnna tinrenga ka khah laiin thlamuanna ka zawng țhin a,
Thlamuanna ka hmuh rual rualin hlauhthawnnain a zui leh si!
Ka hmalam ka thlir a,
Beiseina kawl eng leh hlimna zam vel ka hmu a.
Mahse, beidawnna leh lungngaihnate'n zarhliah an tum si-
"Kei hi mi dawizep leh chak lo mai em ni ka lo nih le ?"
Tia ka dawn chang chuan,
Hmalam kawl eng ka beisei leh țhin.


Ka nunhlui ka dawn kir a,
Kir leh chaka ka auh dawn laiin,
Ka hmaa hlimna zam vel chuan mi lo pawt a.
Hmalam ka hawi a, lungngaihna thuahthip ka hmuhin,
Nunhluia kir ka chak leh si thin.


Mahse, hei erawh ka hria e;
Lungngaihnate chu chapoin langsar hle mahse,
A phenah chuan hlimna tamtak a biru mahna tiin,
Lungngaihnate chu ka kal pel zel ang a,
Beidawnna a beidawn thleng rawkin beiseina chu ka beisei ang a,
A phena hlimna biru chu ka zawngchhuak ngei ang.


Thim hi êngah ka chantir thei lo tih ka hria,
Mahse, thimah chuan êng chauh a hmuh theih si a-
Ka vêl hi eng ang paw'n thim se,
Chu êng chu ka zawng tlat ang a,
A lo chhuahna thlengin.