SIR ROKHAWMA - 1

                 Ziaktu: Biaktea Hillu Ralte

                           BUNG 1-NA

                      I N T A W N N A

Chutia ka mu tui lai ka han harh hlawl mai chu a chhan inzawh buai ngai loin ka hre chiang hle a, tuktina khel loa thleng ziah țhin a ni miau a. Khum ațang chuan tho chhuakin toilet lam pan chuan ka tlan ai ai a, vawithum lai chu ka vawih tlir hman hram pek. Toilet kawngka ka hawn dawn lai tak chuam ka kawngkhar chu tu emaw hian a rawn kik karh karh a, laklawh tehreng nen inleng neih chu hun lo ka ti viau mai.

Pa khan sang lam, hmulphurh chhe zet, dar kun hleu hlo, ban sei den dawn chu ka kawngka-ah chuan a rawn lut dan dan a. A lan dan mai ațang leh a inthuam dan vel ațang chuan Sanitation lam, bawlhhlawh paih motor fee rawn khawn tur te lam lam a ang a. Mahse, chulam pawh chu ka lo ngaihtuah hman chuang lo. Ek chhuak chuan mi nawr tut tut tawh a ni ber. Rawn luh pah chuan a hnar chu a tum deuh dat dat a, hawikual thuak thuak pah chuan, "Va inthiar phawt mai teh. I inthiar zawhah kan titi lawk dawn nia." a ti ta a.

Tukverha dah voh voh pah chuan a kutzungțang cher sei den dawn chuan a khabe chu a lo khawng kauh kauh a. "Tunah chuan i hmel pawh a zia deuh ta, i ek chhuak hmel i pe chhe ve hle mai" tih pah chuan pawnlam chu a thlir zui leh voh voh a. "Eng nge ni ta, eng thil nge zing zingah ?" tia zawh pah chuan ka țhut hmun chu ka rem ve ta a. Muangchanga rawn inher pah chuan, "Ti daih ila, pumpui chakna i mamawh anih kha. Chawhmeh hrawmhraw leh tuihnai lem lo tak tak i ei țeuh țeuh a, meizial i zu nasa bawk si. Pum damdawi i ei ngai bawk si lo, khatiangte chuan ek chhuak hmel i tichhe reng dawn a sin." tih pah chuan a vei khik suk a. Ka zawhna chu chhang lem lo mah se a thil sawi chu a dik phian lawi si. Ka nihna engkim chutia a rawn sawi zung zung ta mai chu mak ka tirilru hle a, "Engtin nge i hriat ngawt ngawt a?" tiin ka zawt ta ngawt a.

"Aw khaih ! Ka hming pawh ka la hrilh hleinem che le ! Sir Rokhawma ka ni a, mahni te hian sawmdawnna chhete ka buaipui ve a." tih pah chuan a kut sei dawn dawn chu a rawn phar chhuak a. Ka zawhna chu a chhang lo leh pek hle. Engvanga a hmingah hian 'Sir' tih hi telh ngawt nge anih ka hre lo a, tun thleng pawh hian ka hre ta lo. A kut chu vuanin kan inchibai ta lawp lawp a.

A ipte ațang chuan zozial lian ang reng tak chu a rawn phawrh a, a țan kaia a pak khu ta luih luih a. A che zia chu a muangchangin ka rilru a tihmanhmawh et et tawh mai. A meizial khu chu pak bial tum niawm tak chuan a hmui chu a tikum phut a, a rawn sawl chhuak ta po po a. Nuih suk pah chuan, "Duhtak Masawm, a mak i ti deuh a ni maw ? Ni e, a mak asin ! Mahse, a mak dan hi mak lo tak a ni lawi si ! Enteh khai, ka rawn luh tirh khan kawngkhar hawng turin toilet lam ațang sawn i rawn tlan phei ai ai a. Patling ve lem, hmel ner nung chunga toilet ațanga kal pangngai pawh ni loa rawn tlan ta ai ai chu i ek a chhuak tih leh ek i tum tih chu a chiang reng. Tin, ka rawn luh tirh khan i Gas a leak em mawni chu aw ka ti hman a. Mahse, Gas hunna tur awmah khian Khawnvartui Stove a inhung thung a, zikhlum kau bai-in a buak deuh liai bawk. Chuti anih chuan Gas i nei lo tih a chiang a, zikhlum bai tharlam takin i Stove a buak luai danah Stove khi i hmang ngei tih a chiang. Gas leak tur a awm bawk si loh chuan khati khawpa uih kha chu i vawih tih a chiang leh ta, toilet lam ațangin i rawn tlan ai ai bawk nen, a induh tawn ta chiah a ni." tih pah chuan a meizial chu a pak sawl po po reng a.

"Chuti zawng chu maw ? A va ho si ve ! Engtin nge zikhlum ka bai tih pawh i hriat ngawt a?" ka lo ti ve khauh a. A khabehmul hiah soh soh pah chuan, "Ni mai lo e. I chhuar khi en teh mah, zikhlum kau, nghathu rep pack hnih, hmarcha ro muh loh, bekangsa tlem. Han bai tur dang a awm lo, zikhlum kau ngei khi i bai tih a chiang reng. Tin, ka sawi tawh kha, chawhmeh hrawmhraw leh tuihnai lem lo tak tak i ei țhin tih chu i chhuar khian zawh ngai loin min hrilh mai. Enteh Duhtak Masawm, mi tamtak hi chuan kan damdawi eina bur ruakte hi bangrelah kan hung dil del duh viau. Nang ang parawl, pa che fel thlip thlep ni lo phei chuan paih fai zung zung lo hian khum bul bangrelah hian kan hung tlar dil del duh viau a. Mahse, chutiang chu i Inah hi chuan hmuh tur a awm lo, i khum bul bangrel phei hi chu meivap leh meizial bung hlirin a inchap dul hi. I vawih uih dan em em te kha ! A uih tur chu a ni. Mahse, a uih dan kha a kulmuk tlat, ka pum țhat loh laia ka vawih uih ang chiah kha a ni....

"Chutichuan, engkim kha a lo induh kual ta vek a. Chawhmeh tuihnai lo tak tak i ei țhin a, pum damdawi i ei ngai lo a, mei i zu nasa hle tih chu a chiang ta reng mai. I vawih uih dan em em leh i ek chhuak hmel pe chhe lutuk khan pum damdawi chu i mamawh ngei ani tih a nemnghet bawk." A thusawi ngai pawimawh lo hmel zet chuan a meizial bung chu tukverhah chuan a pen per lawp a. A dul kiar chhe ve tak hiah soh soh pah chuan a irh zui uk uk a.

A thil sawite kha a dik vek lawi si avang chuan mak ka ti rilru khawp a. Ka inleng pa chu pa namai lo tak niah ka ngai rilru ta hmiah a. Eng thil chiah nge maw a rawn kal chhan ni reng reng le tia ka ngaihtuah nuap nuap lai chuan ka dar chu a rawn beng thuk thuk a.

"Hawh teh Duhtak Masawm, thingpui te in ila, chutih pah chuan thildang; ka rawn kal chhan lam chu kan sawi dawn em ni ang." a ti ta a.

Chu chu Sir Rokhawma nen kan intawn dan chu a ni.