SIR ROKHAWMA - 4

                Ziaktu: Biaktea Hillu Ralte

                        BUNG 4-NA

              A TAWP KHARNA

Hmundanga peng kawi tawh lo chuan Sir Rokhawma nen cbuan Pu Sânglawma te In chu kan pan ding nghal chat a. Misual kan man dawn emaw ka tih laia chutia Pu Sânglawma te In kan pan ta daih chu ka hrethiam lo viau mai. Han zawh dawt ka hreh bawk si a, ngawireng chuan ka zui ve ta tawp a.

Pu Sânglawma te In kan thlen meuh chuan chhun pachang pawh a pachang zo meuh tawh lo a, Ni chu a hnîm deuh raih tawh. Pu Sânglawma te chhung chu chhungkaw kimin an lo awm țhap a . Chutia Sir Rokhawma nen kan inzui lut min lo hmuh chuan an lo phâwk deuh hra a, min lo melh tawn ralh ralh hlawm. Țhut hmun te kan rem fel hnu chuan thingpui te kan in leh te te a. Thingpui kan in zawh chuan Pu Sânglawma chuan, "Pu Khawm, eng nge chanchin ni ta zel, rukru chu kan man thei hmel emaw chu ?" a rawn ti charh charh a. Chutah Sir Rokhawma chuan din hluai pah chuan, "Sânglawm, tette ațangin ka hrechiang em em che a, nangpaw'n min hre chiang. Engah nge mi bawl phet hi i tum ? Hetiang thu lawi loa intihbuai hi ka lai a na riau a nia." tih pah chuan Pu Sânglawma chu a kawk ta sawk sawk mai a, a ngaihna kan hre lo tlang hle.

Pu Sânglawma chuan phâwk leh mak ti hmel zeta Sir Rokhawma melh pah chuan, "Eng thil nge ni ta ngai Pu Khawm ? Eng thu lawi lo hmangin nge maw ka bawl ngawt ngawt che le. Tihtak emah chuan naupan lai zawng zawng paw'n nangman min bawl char char anih kha. Ka Pi zung lai hmawlha va hawlh sak țhin te kha ka duh dan a ni bik hleinem, nangman min bawl tlat pek zel anih kha. Țumkhat phei chu Damdawi In panpui ngai khawpin ka hawlh sak lehnghal. Eng thil chiah nge sawi i tum chu." a ti ve ta a, an boruak a rit dun hle mai.

Chutah Sir Rokhawma chuan a ipte ațanga Kawnghren bung phawrha dawhkana theh thlak pah chuan, "Sânglawm, hei hi i hria em ? Engkim sawi rawh. Nge, keiman ka sawi dawn? Nizana Tlawngkam Zirlai Pawl i Committee-na hmun leh in thu relte ka sawi zawk dawn em ni ? " a ti leh ta charh charh a. Chutah zet chuan Pu Sânglawma pawh chu a meng khup ta zal zal a. An nu chuan mak ti taka Pu Khawma leh an pa melh pah chuan an pa chu sawi tur chuan a tur ta nge nge a. Chutihlaiin Țhuamteii chuan dawhkana kawnghren chu a pa kawnghren ang a tih thu a lo sawi ve mek bawk.

Pu Sânglawma chuan hnuailam bih ngar chung chuan thaw a han la halh a, "Ni e, keima ta ngei a ni. Engkim kha keimah vang vek a ni. Nizan hmasa-a Committee anga ka chhuak kha kan Committee lo hrim hrim a, RV-ah funte kan sawhkeh zawk a ni. Committee kha chhuah theihna chance țha berah ngaiin chhuanlamah ka hmang ta mai a ni. Tichuan, rui chungin ka rawn haw a, ka kaihthawh che chuan ka rui tih i hria ang a, min hau nasa leh dawn si a. Chuvang chuan leihlawn dawhin kalh loa ka dah lawk sa diam tukverhah hian rawn lawnluh ka tum ta a. Mahse, ka lo kai deuh nen ka kar lut tur kha ka chesual a, rod filawr te sawn ka kawnghren a bat ta tlat pek a, ka țanna lamah thawm ka chhuah ta si. Mami nu lah a harh tih hriat takin room kawngkhar a rawn hawng bawk si a, ka kawnghren chu ka phih țhuai a, a bung zui a. Keipawh leihlawnah tawlh thlain ka tlanchhe zui a. A hnu deuhah kawngka ka rawn kik ta a ni....

Rangkachak Sana kha ka nei lo hrim hrim a, ka pu khan min rochun lo hrim hrim. Min rinhlelh loh nan, rukru ngei nia in ngaih theih nan Rangkachak Sana bo angah ka chhuah ta mai a ni e. Kawnghren pawh kha ka ngaina tih in hre vek si a, hreng loa ka,awm chuan in ngaih a țha loang tih ka hlau a, zingkara ka chhuah khan ka va lei leh ta a ni. Pu Khawm, Mami Nu, Bawihi, min ngaidam teh u." tiin Pu Sânglawma chu a inpuang ta kelh a. Mak kan ti tlang bawk ani ang, tuman țawng zai kan rel lo. Kei ngei pawh chuan chutia rin loh dan deuh maia misual nghawnga hruivalh kan han pawt chip ta mai chu ka hrilhai hle a, sawi tur ka van viau mai.

An chhungkaw boruak a rih em avang chuan Sir Rokhawma nen chuan kan chhuahsan a, inhnuai, ka In luah veah chuan kan chhuk dun ta a. Diktak chuan an In chhuahsan thuai thuaia engtin nge Pu Sânglawma dawt mai mai a ni tih a hriat theih tih chu Sir Rokhawma chu ka zawt chak et et tawh. In chhung kan luh fel chuan thingpui ka siam sawk sawk a, thingpui no dawm pah chuan kan țhu dun ta vang a.

Sir Rokhawma chu a ngawi reng a, chanchin han zawh dawt ka hreh deuh bawk si. Mahse, a sawi dawn lo ngiala ka hriat hnu chuan engtin nge a hriatchhuah theih tih chu ka zawt ta nge nge a.

"Duhtak Masawm, a har lo em bawk a ni. Diktak chuan nizan hmasa-a Pu Sânglawmate zu inna Inah khan ka awm ve reng a, amah khan min hmu lo mai mai anih kha. Mak i ti deuh maithei, tunlai chhanah Sawrkarin a senchi min chhawp sak tawh laia RV lama a funte lo la sawhkeh chu. Mahse, a mak lo a sin. Mihring hian kan ngainat tawh hi chu kan lo thlah har khawp. Tunlaiah pawh music style hrang hrang a tam tawh vei nen a ngaina laklawh chuan Leikapui style an la tih fan fan hi, hetiang hi a ni ve mai." tih pah chuan a dul thak chu a hiat soh soh reng a. A sawi chu dik hmel fu chuan ka hre roh a.

"Tichuan a tuk zingah khan Tlawngkam Zirlai Pawl Committee angin a lo insawi leh bawk si a, eng emaw dawt inzep ru a awm hi ka ring sa reng a ni. Tin, amah hi khawkhat chhuak, ka hriat chian a ni a, a pu phei hi chu a pian hma daih hian a thi tawh. Rangkachak Sana rochuntu tur Pu a nei lo tih ka hre sa a, rangkachak sana kha a nei tak tak lo tih ka hre sa reng a lawm"

"Tinge i zawn sak tho si ? A tir khan sawi nghal mai ta che. "

"Zawng turin min ti miau sia lawm."

"A ho mang e. Anih engtin zel ?"

"Kawnghren ngaina em em leh hreng reng mai hi a ni a, a savun kawnghren phei kha chu Samak vun ațanga siam a ni a, a tloin a neihna pawh a rei tawh a, ka bulah pawh hian vawi duai lo a lo fak tawh. Țumkhat phei chu keipaw'n ka kekawr kawng a thawl deuh vangin ka hren sak tawh nghe nghe. Khatia kawnghren bung ka chhar pawh khan a savun kawnghren ngei kha a niin ka hre nghal chat a. Mahse, amah pui roh khan kawnghren kha a la hreng țut reuh bawk si, ka chhar lah kha a bung mai ani sia a ta ngei tih kha ka chiang ngam ta chiah bik lo. Mahse, a savun erawh Samak vun ngei anih avangin ama ta ngeiah chuan ka ngai nghet hmak thung. Chuvang alawm, misual mei hmawra kan man țhelh thuak thuak thu ka hrilh reng che ni."

"Amah pawh kha zawha en chian nghal mai tur alawm, hun seng vak lo khan."

.

"Khai ! Chutiang ten ka ringhlel tih a hrethiam ang a sin."

"Hmmmm......han sawi zel teh."

Nuih vur vur pah chuan, "Tichuan han bawhzuia han tih tehchiam tur kha a awm lem si loa, nilengin ka chanchinbu hlui leh saum bawlhlo leh suangtuahnate hmangin thil ni thei tur ka ngaihruat ta a. Chutah Zion Street lama ka nautehoin an hre tak ang tiin kan va hmu dun ta rawih anih kha. Ka nauteho khan amah Pu Sânglawma kha an hre sa hrim hrim a, kan inzui nasat em avangin ka hmelhriat tir ve vek a ni. An ni ho khan Pu Sânglawma'n zingkar hma ang reng takah kawnghren a lei ngei tih min hrilh hnu chuan buaina tur dang a awm tawh lo. Ka kawnghren chhar, ka rinhlelh ruk ngei chu a ta ngei tih a chiang a, nimin zinga a lo hren țat kha chu a lei thar tih a chiang ta a ni. Chuvang a lawm, misual nghawnga hruivalh kan thlun tawh thu leh pawh chip chiah kan hmabak anih tawh thu ka hrilh che ni." tih pah chuan intithei hmel tak chuan a meizial chu a phawrh a, a țan khu ta luai luai a.

Ho viau mahse a thil chhuichhuah dan chu keini, vai velh bak thiam nei lem lo tan chuan kan koa tla ni se thil huphurhawm tak ni chuan ka hre tho mai. Mahse, thil hre chiang sa tluk a ni a, khatianga a'n che kual vel kher kha kei chuan a țulna ka hre lo hle. Mahse, ani ang thiamna ropui tak nei, kungfu leh mitdawivaih mai bakah Keite leh Chinghne hriatna țha mi nei tel, Police thiamthil thiam vek bawk siin khatianga a ti anih si chuan tih dan tur reng leh Detective chet phung turah chuan ka ruat ta hmiah a. Detective thlirna tlang ațanga kan thlir chuan che ropui viau chuan ka hre lawi. Ka rilruah chuan thil pakhat a rawn lang zawr a, nimin lama ka zawt ang ka tih tawh ngei kha. Engtin nge Chengkawl hipna a chhar kha Tlawng chengkawl a ni tih leh karhnih liamta a mi a ni tih a hriat theih tih chu ka zawt ta nge nge a.

Mi nuih suk pah chuan, "Duhtak Masawm, zawhna i ngah hle mai. Mahse, nangni ang tan chuan zawhna awm reng a ni. Ka hriat ang hi chu hre ve la mi zawt hauh lo ang. Karhnih liam ta mai khan amah Pu Sânglawma nen ngei hian Tlawngah Chengkawl kan chhit dun alawm. Chumi țum chuan Chengkawl an hmeh lohna rei tawhzia a sawi nghe nghe a. Chuti anih chuan khatia an kawmthlanga Chengkawl hip ruahna la hlui lutuk lo awm kha chu kan chhit dun ngei, Tlawng Chengkawl kha a ni tih a chiang em em a ni." tih pah chuan hnar er ngawk ngawk chuan a'n nui leh a. A ho ka ti leh pek hle mai.

"Anih leh chanchinbu hlui hnim kual leh Saum bawl vel te kha eng nge a țangkaina?"

"Oh.. Duhtak Masawm, engmah țangkaina a awm lo, ziah tur titamtu atana ka tih anih kha."

                           ** THE END **