TLANGSAWIVELA KHA

                 Ziaktu: Biaktea Hillu Ralte



Khiangawia en țhin chuan kan hre vek awm e. Khatia a film tawp lama 'AWKE' hla nalh fahrana rawn thlawhtu kha Amah Tlangsawivela ngei anih kha. Entu mipui tamtak te'n nalh kan ti a, zaithiam hlein kan hre hlawm bawk. Țhenkhat chuan Pakhatna Khiangawia ai khan zaithiam an tizawk a, pakhatna a ni lo kha lo vuipui tawk pawh kan bang lo.

Engpawhnise, a mawh hran lo e. A hlathu a țhain Mizote rilrem zawng takin lung a kuai vei roh fu a. Tin, amah kha zaithiam lo zawk zawk chu a ni hauh lo bawk.

Mahse, hetiang ni si engvanga point hmu tlem em em nge a nih ? Chif Jats Kawbina phei chuan point pawh pe loin 'AR LU' ringawt a pe a nih kha, chu pawh a fiah lo zawk lehnghal ! A fans-te tan chuan hriatthiam a har hle ang.

Han thlirlet i la, nguntaka kan en chuan a zai zawh hlim kha chuan Chif Jats Kawbina pawh kha a lawm hmel hle niin a hriat. A hla kha mawi a tih thu pawh a sawi chhuak hial anih kha. Chutih rualin zai țha a intih leh tih loh leh, a hla kha tu phuah nge tih a zawt tel bawk anih kha. Chif Jats meuh hla duh leh mawi a tih em em a rawn sa kha Tlangsawivela tan chuan beisei a sang hle ang. Tin, amah chang ni loin a fans-te pawh kan bang bik chuang hauh lo.

Mahse, rin loh lam daihin thil a thleng ta tlat! Tlangsawivela khan a hre loa a risk tak tak nge, a lo hresual zawk ni dawn tehreng, a hla phuahtu kha Vankeua a nih laiin Ramtea Kamding a rawn ti ta tlat mai! Chif Jats Kawbina hmel a danglam nghal a, a engamah hmaa a rawn risk mai khan a thin a tirim hle anih kha. Chif jats berin point pawh pe loa ar lu mai a pek avang khan Pi Berekai tan han tih viau kha a nawm lohna chen a awm ngei ang. Chu lo rengah a thin tirim tawk lek khan Tlangsawivela khan a chhang kher bawk a tin ni. Tlangsawivela pawh kha a țawng thei mah mah kan ti thei ang. Tin, Pu Huanzaua țawngkam ațang khan an ti mah mah deuh tih a hriat theih a. A lan dan mai kha chuan thiam lo zawk zawk a ti lo ni chuan a hriat. Mahse, chif jats Kawbina leh Berekai ten khati teh hrepa an tih hnu kha a thlavang a rawn hauh ngam bik ta lo niin alang. Hemi kawngah hi chuan jats a nihna anga a tihtur a hlen lo niin a hriat theih a, a demawm ang reng.

Tlangsawivela khan a risk ve hrim hrim nge ni ang a, a hresual zawk tih hi ngaihtuah tham tak a ni. A insawidanin kha hla kha an vengte paw'n thiam an ti ber niin a insawi a. Chuti anih chuan vawikhat mai ni loin vawi eng emaw zat chu an vengah pawh a lo sa tawh țhin tih a chiang reng mai. Chutiang khawpa a hla chulnel chu a phuahtu chu hre ve ngei tur pawh a ni. Ngaihtuah buai mang miah loa Ramtea Kamding a rawn tih mai danah khan, he Ramtea Kamding hi kha hlaah khan inhnamhnawihna a nei a ni mai lo maw?

Țhenkhat ngaihdan chuan Ramtea Kamding hi a thluk siamtu a ni ang a, a phuahtu Vankeua nen ngaihpawlhin a phuahtu zawkah a rawn chhal ta mai a ni awm e tih a ni a. Hei hi pawm a nuamin ni ngei pawhin a lang. Mahse, a hla sak ngun leh thiam ber ni bawk phuahtu leh a thluk siamtu pawh hre hrang loa a hre chiang lo hi a zia lo hle. A hre lo hrim hrima a lo risk tak tak anih phei chuan a zia lo leh zual. Risk mai loin a hriat loh thu țhataka sawi chu ni se, Kawbina pawh ti em em khan a thinrim lo ngei ang. Point pawh pangngai taka hmuin pahnihna hial pawh a ni thei maithei a ni.

Tlangsawivela chanchin ațang hian eng emaw han sawi lawk ta ila. Thil chi hrang hrang; kan zirlai, kan eizawnna, kan nunkawng leh kan thil tih chi hrang hrangah kan tih hi kan chiang tur a ni a. Eng nge a nih chiah hre lem lo, a țobul, kalphung leh eng emaw, eng thil nge a thlen theih, engtin nge a nih zel ang..adt..tih hre chiang lem loa thil tih ve ngawt hian hlawhtlinna kawng hi min pan pui tehchiam lo a. Buai zualna leh beidawnna ruamah te min hnuk lut fo. Kan thil tih engkim mai hi kan phaktawkah kan chiang ve em em tur hi a ni ringawt mai a ni.

Tin, hringnunah hian a ngaihna hriat thlawt loh chang a awm țhin. Tamtakin risk an la a, tifuh mual mual leh fuh lo fe fe lah kan tam. Eng hun pawh tawk i la, kawng khat chauha thil kan thlir hian a buaithlak țhin. A sir kil tin mai ațang hian han lepse mai ila, kawng awm loa kan ngaihah hian kawng a lo awm leh mai țhin.

Amaherawhchu, kawng awm thlawt lo emaw, kawng awm chhun pawh kan zawh chi ni miah lo a awm thei ang. Chung hunah chuan risk lak hmiah hi a țha ang. Mahse, risk lak hi a risky em avang hian engkim erawh kan inhuam tur a ni ang.

Risk la tur hian huaisen a ngai hle a, a vawrtawp tak meuhah pawh risk la ngam lo khawpa dawihzep ni hauh suh ang che.


                     ** THE END **