"UKHUMA'N UȚHUAMTEI VIRGIN A HAWNG" AN TI; MAHSE, UKHUMA'N A HRE LO !

                  Ziaktu: Biaktea Hillu Ralte




Nl. Țhuamtei chu khaw khat nula hmelțha a ni. Biangsum pawh a biang tawn tawnah a nei. Tlangval zawng zawngin an duh leh hisap rawn; mahse, an beisei leh ngaihzawn ngam loh a ni thung. A lakah chuan tlema hmel 'Pûak' inti ve chin pawh an hawi 'Nghathu' leh run țhin. An khua mai ni lo; khualkhua ațang paw'n rimtu leh ngaihzawn tumtu chu nitin deuh thaw hian a nalh thei ang berin, pangngai takin an rawn kal kat nuk fo. A duhawmna tiduhawm zual tura ngaihnobei taka biangsum lak kêka a'n nuih ngat phei chuan putar te te paw'n kekawr ipte zen ngar ngar chungin an kezungpui an tawm leh țalh țalh fo țhin.

Hmanlai nula hmelțha-a an sawi Chhingpuii hmelțhatna mahin kawi sarih a en thei anih chuan Nl. Țhuamtei hmelțhatna chuan a mual a mualin a hawi lam apiang hi Pu Denghnuna mangkhawh inbual fai hlim ang maiin a fai hian a fai duak duak mai țhin. A kalna hnu leh a awmna apiangah a zûn lêng leh zâm a hnutchhiah emaw tih mai turin a sulhnu chhui leh zuiin tlangval rual an insulpel thuak thuak a. Feh kawngah te hian, "A vawih thawleng tal kan hip pha mahna" tiin tlangvalho hian a mawng phe tal hmuh tumin, hnaihchilh ngam chiah si lovin kawng kawiah an ring an fân nasa țhin hle.

Ukhuma hi tlangval senior a ni. A vun hi dum bik viau lo se'ng chuan a hang bik miah lo ang. Kut hnathawh hi a til thenna lam a ni a; mahse, til then nawlh nawlh khawpa phur taka a hnathawk tur kal erawh hmuh tur a vang țhin fu. A ha kar hi khât em em e ti lovin a țo kawihsawih em avang hian a ha karah thil a tang duh hle a. A ei len deuh leh a tang lian a; a ei tet leh a tang te deuh a nimai. A ha kara thil a tan nasat țhin em avang chuan hakhernain a ha a hawlh deuh reng a. Ha hawlh reng e ti lo chuan Upate'n 'Ha hawlh zawng' an tih ang erawh a nei leh miah lo thung.

Nula a be lai hmuh tur a vang hle a. Nula rim anga a len luh ve țhin paw'n țhiante karah țawng lem lovin a tlingtla ve mai țhin. A ngaihzawng neih tawh emaw, a ngaihzawn awm ang phei chu sawi tur hria an awm lo. Amah paw'n phuahchawp tur takngial pawh a hre lo. Engtiklai paw'n T-Shirt hma phel leh Track kekawr; Uvansiama te In rawng chu a ha reng a. A track kekawr hi a khup a țet. Mahse, amah Ukhuma hi a khân a sân roh avangin a kekawr hi a chhing deuh a, a track kekawr khup țet chu a malpui zawnah a pawp thung. Istiri hi puan nawhna a ni tih hre tho mahse Emergency light emaw a ti tlat bawk.

Tlai khat chu naupangho kawtchhuaha an lo infiam dal dal lai chuan Nl. Țhuamtei feh chu a rawn haw a; a puana a hmai hup chung chuan a rawn kal chip deuh chan chan a, naupangho chuan an en duh hle. Naupanghoin an lo thlek dauh dauh lai chuan an zawn chu a rawn thleng a, a hnathawh kekawr kap leh mawng bawra thisen kai liai chu a lang chiang hle. A puan tlang lehlama a mittui hruk zauh zauh pah chuan a tlang lehlam chuan a mawng bawr chu a khuh țang țang bawk.

Nl. Țhuamtei a kal liam hnu lawk chuan Ukhuma pawh T-Shirt hma phel huaiin a rawn kal ve thlôh thlôh a, naupangho chuan an lo en duh leh pek hle. Naupanghoin ka deuh ho chung leh eng emaw ngaihtuah nei tih hriat taka an lo thlir țhap lai chuan an zawn chu a rawn thleng a; a kekawr dawr a khar loh kara a suahsual tiang rawn then lauh lauh pawh a lang chiang ta hle.

Nl. Țhuamtei chuan In a thlen ve leh engmah dang sawi lo leh tihzai rel lo chuan Bual-In lam a pan thuai a. Rang taka a hnathawh kekawr a hlih hnu chuan kun ngar ngar chungin a saum bur chu a zen ngar ngar a. A tawpah chuan dimna leh duatna, hmangaihna tel hauh lova thisen chhuah khawpa a saum bur; saum bur azawnga hlu ber leh mi zingah pawh phawrh duh loa a ruka a Uțawk tur vawn ve tlat lo fawptu, Vangvat puar țha tak chu a rawn lek chhuak ta hlawl a. A mal velah chuan thisen chu a la rawn luang ngiai ngiai bawk.

Ukhuma pawh In a thlen chuan a hahdam thei ang berin chhuatah chuan a țhu dawrh suah a. Chutia a țhu dawrh deuh suah chu an kawmthlang te naupang chuan rawn hmuin, "Apakhum i kekawr ziper i zip lo a nia" a rawn ti a. A inen vat a, a kekawr dawr inhawng huau karah chuan a suahsual tiang tereuh chu a lo vei thlek ngat a; hah ve hmel zet hian a lo țhen deuh bai a. Khawthlira a hahchawlh laia a zun khan a kekawr ziper chu a lo khar lo a ni tih a hrechhuak nghal a. A chhan pawh kawng chhak ațanga Pu Dailoa te Bawng hur inchhuzui an rawn rik thlak phut vang. A phu chiang lutuka zun pawh zung zo țha hman lo leh a kekawr pawh khar loin a rawn kal leh nghal daih a ni.

Naupangho chuan chutia Nl. Țhuamtei; an khaw nula hmelțha feh haw țap deuh pur leh a kekawr kap leh mawng bawra thisen kai liai mai te, a hnunga Tlangval Senior Ukhuma; kawr hma phel huai leh kekawr ziper inhawng veka rawn kal ta chu mak an tiin an ngaihtuahna a tibuai hle a. Tlema lian deuh leh thil nihphung hrethiam tawh te chuan, "Ukhuma khan Nl. Țhuamtei virgin a hawng chiang lutuk" tiin an inhrilhru sap sap hlawm a.

Chuta țang chuan naupangho leh an sawi hria apiang mai chuan, "Ukhuma'n Uțuamtei virgin a hawng" an ti ta sup sup a. Mahse; Ukhuma chuan engmah a hre lo !!



                         ** THE END **